२३ साउन,बारा । गत असार २४ गते नेपाल-चीन सीमा क्षेत्र रसुवामा आएको भीषण बाढीमा बेपत्ता भएका प्रहरी जवान मुन्ना ठाकुरको शुक्रबार कुशको प्रतीकात्मक शव बनाएर दाहसंस्कार गरिएको छ।
कर्तव्य पालनाका क्रममा बाढीले बगाएर बेपत्ता भएका ठाकुरको एक महिना लामो खोजी गर्दा पनि शव फेला नपरेपछि परिवारजनले धार्मिक विधिपूर्वक अन्त्येष्टि गरेका हुन्।
बाराको फेटा गाउँपालिका-१, भलुही टोलका २४ वर्षीय ठाकुर सीमा सुरक्षा फाँटमा कार्यरत थिए। असार २४ गते बिहान ल्हेन्दे र भोटेकोशी खोलामा आएको आकस्मिक बाढीले उनलाई ड्युटीमा रहेकै बेला बगाएको थियो।
घटनालगत्तै स्थानीय प्रशासनको सक्रियतामा प्रहरी र स्थानीयले निरन्तर खोजी गरे पनि उनको शव भेटिएको थिएन। बाढीले निम्त्याएको यो विपत्तिको समयमा पनि प्रहरीले आफ्नो ज्यानको जोखिम मोलेर कर्तव्य पालना गरेको थियो, जसको उच्च प्रशंसा गरिनुपर्छ।
लामो समयसम्म शव फेला नपरेपछि ठाकुरको परिवारले धार्मिक परम्पराअनुसार कुशको प्रतीकात्मक शव तयार गरी शुक्रबार उनको गाउँमै अन्त्येष्टि गरेका हुन्। यस दुःखद घटनाले परिवारमा गहिरो शोक छाएको छ। ठाकुरको श्रीमती र एक सानो छोरा छन्, जसले अब आफ्नो अभिभावक गुमाएका छन्।
प्रतिक्रिया दिनुहोस् !