२३ साउन,बारा । नेकपा एमाले जितपुर सिमरा उपमहानगरपालिका कमिटिका अध्यक्ष त्रिलोक शाह ठकुरीले जगदम्बा र हुलास लगायतका उद्योगहरूले प्रदूषण फैलाएर जनताको स्वास्थ्यमाथि खेलवाड गरेको भन्दै कडा चेतावनी दिएका छन्।
उनले सामाजिक सञ्जाल फेसबुकमार्फत राज्य नेतृत्वसँग पहुँच भएको भन्दै कानुन मिचेर जनताको स्वास्थ्यमाथि खेलवाड गर्ने उद्योगी व्यापारीलाई एक दिन सजाय भोग्नपर्ने बताएका छन्।
उनले आफ्नो फेसबुक स्टाटसमा लेखेका छन्, ‘राज्य नेतृत्वसँग पहुँच छ भन्दैमा उद्योगी व्यापारी कानुन विपरीत गएर जनताको स्वास्थ्यसँग खेलवाड गर्छन् भने एक दिन सजाय भोग्न पर्छ तिमीहरूले पनि। हेक्का रहोस्, सधैं तिमीहरूको पैसाको दादागिरी नचल्ला, हामी पनि मूलधारको राजनीतिमै छौँ, दिन आउला। तिमीहरूलाई कारबाही गरेरै छाड्ने हो।
यसले लामो समयदेखि प्रदूषणको मार खेपिरहेका सिमरावासीको समस्यालाई सम्बोधन गरेको छ। यी उद्योगहरूबाट निस्किने धुवाँ, धुलो र रसायनयुक्त फोहोरका कारण स्थानीय बासिन्दा विभिन्न स्वास्थ्य समस्याबाट ग्रसित छन्। श्वासप्रश्वाससम्बन्धी रोग, छालाको समस्या र आँखा पोल्ने जस्ता गुनासाहरू सिमरावासीले गर्दै आएका छन्।
यसअघि पनि स्थानीय र विभिन्न सङ्गठनहरूले प्रदूषण नियन्त्रणका लागि पटक-पटक आवाज उठाउँदै आएका थिए। तर, उद्योगको ‘राजनीतिक पहुँच’का कारण उनीहरूमाथि कुनै कारबाही नभएको आरोप लाग्ने गरेको छ।
अध्यक्ष ठकुरीको यो अभिव्यक्तिले प्रदूषण नियन्त्रणको मागलाई राजनीतिक मुद्दाको रूपमा स्थापित गरेको छ। अब यस विषयले थप चर्चा पाउने र प्रदूषण नियन्त्रणका लागि दबाब बढ्ने अपेक्षा गरिएको छ।
प्रतिक्रिया दिनुहोस् !