२२ साउन,काठमाण्डाैं । मनसुनको समयमा हुनसक्ने विपद्को जोखिमलाई ध्यानमा राख्दै सशस्त्र प्रहरी बलले देशभर ४१ स्थानमा मनसुन प्रतिकार्य अस्थायी बेसहरू स्थापना गरेको छ। यसको मुख्य उद्देश्य विपद्मा परेका नागरिकलाई तत्काल उद्धार र राहत प्रदान गर्नु रहेको छ।
सशस्त्र प्रहरीका केन्द्रीय प्रवक्ता सशस्त्र प्रहरी नायब महानिरीक्षक कालिदास धौवजीका अनुसार, यी बेसहरू जोखिमयुक्त क्षेत्रहरूमा पहिचान गरी स्थापना गरिएको हो र ती स्थानहरूमा विपद् उद्धारका लागि आवश्यक सामग्रीसहितको टोली तयारी अवस्थामा राखिएको छ।
काठमाडौं उपत्यकामा कोलमटेश्वर मन्दिर, धर्मस्थली, धापासी, ललितपुरको लेले र भक्तपुरको सानोठिमीमा मनसुन प्रतिकार्य बेस स्थापना गरिएको छ। कोशी प्रदेशअन्तर्गत मोरङको बखरी र ओखलढुङ्गाको हर्कपुरमा बेसहरू छन्।
मधेस प्रदेशस्थित सप्तरीको भारदह र बर्साइन, सिरहाको मिल, धनुषाको दुवरकोट, महोत्तरीको रघुनाथपुर र बनौटा, सर्लाहीको धरहरा, रौतहटको फतुवा, बाराको तेलकुवा र कलैया तथा पर्साको पोखरियामा पनि बेस स्थापना गरिएको छ।
यसैगरी, बागमती प्रदेशअन्तर्गत मकवानपुरको सुनौला, काभ्रेको खालथोक र मङ्गलटार, नुवाकोटको खरानीटार, चितवनको भालढुङ्गा, दोलखाको लिङ्कन बजार र सिङ्गटी, साथै रसुवाको तातोपानीमा बेस राखिएको छ। गण्डकी प्रदेशमा पर्वतको खहरे, गोरखाको आरुघाट, पूर्वी नवलपरासीको चोरमारा र कास्कीको छाचोकमा बेसहरू छन्।
लुम्बिनी प्रदेशस्थित बर्दियाको राजापुर, रुपन्देहीको बुटवल, बाँकेको कुण्डा र कचनापुर, गुल्मीको तुराङ्ग र पाल्पाको दोभानमा बेसहरू स्थापना भएका छन्।
कर्णाली प्रदेशमा जुम्लाको बड्की, मुगुको डिमुरखारा र जाजरकोटको दल्लीमा बेस राखिएको छ भने सुदूरपश्चिम प्रदेशमा कैलालीको खानी डाँडा र डोटीको बुडरमा मनसुन प्रतिकार्य सुरक्षा बेस स्थापना गरिएको छ।
यी बेसहरूको स्थापनाले मनसुनका कारण आउन सक्ने बाढी, पहिरो तथा अन्य विपद्को समयमा नागरिकको जीवन र सम्पत्तिको सुरक्षामा महत्वपूर्ण भूमिका खेल्ने अपेक्षा गरिएको छ। यसअघि, सशस्त्र प्रहरी बलले विपद् व्यवस्थापनमा स्थानीय समुदायको संलग्नता बढाउनका लागि देशभर १ लाख ६८ हजार ९५६ जना विपद् सूचक तयार गरेको र ९९० जनालाई विपद् स्वयंसेवक तालिम पनि प्रदान गरेको जनाएको छ।
प्रतिक्रिया दिनुहोस् !