यस वर्षको कक्षा १२ को नतिजा साउन २५ गतेभित्र प्रकाशित हुने

१६ साउन,काढमाण्डाै । राष्ट्रिय परीक्षा बोर्डले यस वर्षको कक्षा १२ को नतिजा साउन २५ गतेभित्र सार्वजनिक गर्ने तयारी गरेको छ। शिक्षक आन्दोलनका कारण परीक्षा निर्धारित समयमा हुन नसक्दा नतिजा प्रकाशनमा ढिलाइ भएको हो।

बोर्डका परीक्षा नियन्त्रक कृष्णप्रसाद शर्माका अनुसार नतिजा प्रकाशनका लागि आवश्यक प्राविधिक कामहरू तीव्र गतिमा भइरहेका छन्। “परीक्षा ढिला भएकाले नतिजा पनि केही दिन ढिला भएको हो,” उनले भने, “हामी साउन २५ गतेभित्र नतिजा सार्वजनिक गर्ने तयारीमा छौं।”

यस वर्षको परीक्षा वैशाख ११ गतेबाट सुरु हुने तय भए पनि शिक्षक आन्दोलनका कारण १० दिन ढिला गरी वैशाख २१ गतेदेखि सुरु भएको थियो। देशभरबाट नियमित, ग्रेडवृद्धि र आंशिक गरी कुल ५ लाख ११ हजार ५ सय २५ जना परीक्षार्थी सहभागी भएका थिए।

नतिजा प्रकाशनपछि विद्यार्थीहरूले बोर्डको वेबसाइट, एसएमएस र मोबाइल एपमार्फत आफ्नो नतिजा हेर्न सक्नेछन्।