१५ साउन,बारा । जिल्ला प्रहरी कार्यालय, बाराले लागूऔषध ब्राउन सुगरसहित एकजनालाई पक्राउ गरेको छ। पक्राउ पर्नेमा जितपुर सिमरा उपमहानगरपालिका वडा नं. २, रेलवे लाइन टोल बस्ने ४० वर्षीय सरोजकुमार कुर्मी रहेका छन्।

प्रहरीका अनुसार, गोप्य सूचनाका आधारमा इलाका प्रहरी कार्यालय सिमराबाट खटिएको प्रहरी टोलीले बुधबार साँझ करिब ६:३० बजे कुर्मीको घरमा खानतलासी गरेको थियो।

खानतलासीका क्रममा उनको घरबाट लुकाइछिपाइ राखेको २.०४ ग्राम ब्राउन सुगरजस्तो देखिने खैरो पदार्थ र एउटा डिजिटल तराजु बरामद भएको जिल्ला प्रहरी कार्यालय, बाराले जारी गरेको प्रेस विज्ञप्तिमा उल्लेख छ।

बरामद गरिएको लागूऔषध र तराजुसहित कुर्मीलाई नियन्त्रणमा लिई थप अनुसन्धानका लागि जिल्ला प्रहरी कार्यालय, बारामा ल्याइएको प्रहरीले जनाएको छ। घटनाबारे थप अनुसन्धान भइरहेको प्रहरीले बताएको छ।