१३ साउन,बारा । जलविहीनताको चपेटामा परेको मधेश प्रदेशमा सरकारको सुस्तताप्रति आक्रोश व्यक्त गर्दै बारा क्षेत्र नम्बर ४ का प्रतिनिधि सभा सदस्य कृष्णकुमार श्रेष्ठ (किसान) ले आफ्नै पहल र खर्चमा नहर सरसफाइ गरेका छन्।
वर्षा नहुँदा मधेशका नागरिक आक्रान्त बनेका बेला सरकारले संकटग्रस्त क्षेत्र घोषणा गरे पनि नागरिकले राहत पाउन नसकेको भन्दै सांसद श्रेष्ठले सरकारको भूमिकामाथि प्रश्न उठाएका छन्।
यतिबेला खेती लगाउने समय भए पनि पानीको अभावले किसानहरूले बाली लगाउन सकिरहेका छैनन्। भएका नहरहरू पनि जलकुम्भी र फोहोरले भरिएका कारण पानी प्रवाह हुन नसक्दा समस्या झन् विकराल बनेको छ।
नारायणी सिँचाइ कार्यालयलाई पटक-पटक नहर सफाइका लागि ताकेता गर्दा बजेट अभाव देखाउँदै पन्छिने गरेको सांसद श्रेष्ठले बताए।
“जनतालाई संकट पर्दा डिलमा बसेर टुलुटुलु हेरिरहन मेरो मनले मानेन,” सांसद श्रेष्ठले भने, “त्यसैले मैले आफ्नै पहल र खर्चमा जलकुम्भी र फोहोरले पुरिएको नहर सफा गरेको छु।
” उनले सफाइ गरेपछि नहरमा पानी बग्न थालेको र यसले फेटा र विश्रामपुर गाउँपालिकाका केही वडाका किसानहरूलाई केही हदसम्म राहत पुग्ने विश्वास व्यक्त गरे।
मधेशमा यसरी सफा गर्नुपर्ने थुप्रै नहरहरू रहेको भन्दै सांसद श्रेष्ठले तत्काल सरकारको ध्यानाकर्षण गराएका छन्। उनले सरकारलाई जनताको पीडामा रमिते नबन्न र तत्काल ठोस कदम चाल्न आग्रह गरेका छन्।
पिउने पानीको समेत संकट बढ्दै जाँदा नागरिकहरू आकुलब्याकुल बनेको अवस्थामा सरकारको संवेदनहीनताले थप निराशा बढाएको स्थानीयवासीको गुनासो छ।
प्रतिक्रिया दिनुहोस् !