९ साउन,बारा । मधेश प्रदेश: सम्माननीय प्रधानमन्त्री केपी शर्मा ओलीले अन्नको भण्डार मानिने तराई/मधेशलाई ‘सुख्खा क्षेत्र’ घोषणा गरेलगत्तै मधेश प्रदेशको भ्रमणमा रहनुभएको छ।
यसै क्रममा आज प्रधानमन्त्री ओलीले बारा जिल्लाको परवानीपुर गाउँपालिकामा नवनिर्मित प्रशासनिक भवनको उद्घाटन गर्नुभयो।
प्रधानमन्त्रीको यस भ्रमणले मधेश प्रदेशमा नेकपा (एमाले) प्रति जनसमर्थन बढ्दै गएको संकेत देखिएको छ। मधेशलाई सुख्खा क्षेत्र घोषणा गर्ने प्रधानमन्त्रीको निर्णयलाई यस क्षेत्रका किसान तथा स्थानीय बासिन्दाले ठूलो राहतका रूपमा लिएका छन्। लामो समयदेखि सिँचाइको अभाव झेल्दै आएका किसानहरूले यस घोषणालाई स्वागत गरेका छन्।
आज परवानीपुरमा आयोजित कार्यक्रममा बोल्दै प्रधानमन्त्री ओलीले मधेशको विकास र समृद्धिका लागि सरकार प्रतिबद्ध रहेको बताउनुभयो। उहाँले सिँचाइको समस्या समाधान गर्न र कृषि उत्पादन बढाउनका लागि विशेष योजनाहरू ल्याउने प्रतिबद्धता व्यक्त गर्नुभयो। “मधेश नेपालको अन्न भण्डार हो।
यहाँको जमिनलाई सुख्खा हुन दिइने छैन। सरकारले सिँचाइका लागि आवश्यक सम्पूर्ण व्यवस्था गर्नेछ,” प्रधानमन्त्री ओलीले भन्नुभयो।
परवानीपुर गाउँपालिकाको नवनिर्मित प्रशासनिक भवनको उद्घाटनले स्थानीय सेवा प्रवाहमा सुधार आउने अपेक्षा गरिएको छ। यस अवसरमा स्थानीय जनप्रतिनिधिहरू, पार्टीका नेता तथा कार्यकर्ताहरू र सर्वसाधारणको उल्लेख्य सहभागिता रहेको थियो। प्रधानमन्त्रीको भ्रमणका क्रममा देखिएको जनसहभागिता र उत्साहले मधेशमा एमालेको प्रभाव विस्तार हुँदै गएको स्पष्ट संकेत दिएको छ ।
स्थानीय बासिन्दाहरूले प्रधानमन्त्रीको भ्रमण र मधेशलाई सुख्खा क्षेत्र घोषणा गर्ने निर्णयले आफूहरूमा आशा पलाएको बताएका छन्। यो भ्रमणले मधेशमा एमालेको संगठनलाई थप बलियो बनाउन सहयोग पुग्ने विश्वास गरिएको छ।
प्रतिक्रिया दिनुहोस् !