सञ्जय मिश्रा
८ साउन,राैतहट । सुखाग्रस्त जिल्ला रौतहटमा खेतमा पानी पताउने क्रममा एकसाता भित्र विद्युतिय मोटरबाट करेन्ट लागेर ४ जना किसानको मृत्यु भएको छ।
बिहीवार दिउँसो मौलापुर नगरपालिकाका प्रवक्ता तथा किसान ५५ बर्षीय चन्देश्वर बैठाको करेण्ट लागेर निधन भएको हो।
मौलापुर ७ ननकार पथरा गाँउ घरभएका बैठा बिहीवार अपरान्ह आफ्नै खेतमा पानी पटाउने क्रममा बिधुतिय मोटरबाट करेन्ट लागेर अचेत भएका थिए। लगत्तै एम्बुलेन्सबाट उपचारको लागि प्रादेशिक अस्पताल गौरमा लैजाँदा डाक्टरले बैठालाई मृत घोषणा गरेको ईलाका प्रहरी कार्यालय मौलापुरका प्रमुख इन्स्पेक्टर प्रवेश कार्किले बताएका छन्।
यस अघि जिल्लामा एकसातामै खेतमा धान रोप्न पानी लगाउने क्रममा करेन्ट लागेर तीन किसानको मृत्यु भएको छ ।
हिजो
बुधबार बिहान माधव नारायण–४ बिसनपुर्वा मानपुरका ४० वर्षीय रामबाबु मुखियाको खेतमा सिँचाइका लागि विद्युतीय मोटरबाट पानी पटाउने क्रममा करेन्ट लागेर मृत्यु भएको इलाका प्रहरी कार्यालय गरुडाका प्रमुख डिएसपी राजन कार्कीले जानकारी दिएका छन्। सिँचाइ गर्न जडान गरिएको मोटरको तारबाट करेन्ट लागि घाइते भएका मुखियाको उपचारको क्रममा प्रादेशिक अस्पताल गौरमा मृत्यु भएको थियो।
त्यसैगरी कटहरीया–२ जमुनिया गाउँका ५२ वर्षीय मोक्तार देवानको पनि खेतमा पानी लगाउने क्रममा करेन्ट लागेर मृत्यु भएको डिएसपी कार्कीले जानकारी दिएका छन्।
करेन्ट लागि घाइते भएका देवानको उपचारको क्रममा गरुडास्थित ग्राण्डी अस्पतालमा मृत्यु भएको थियो। त्यस्तै गत असार ३१ गते मौलापुर–८ सोनरनियाका १४ वर्षीय गोलु भन्ने नरेन्द्र पटेलको पनि खेतमा पानी लगाउने क्रममा करेन्ट लागेर मृत्यु भएको थियो ।
यसवर्ष तराईमा खडेरी परेको कारण किसानहरुले मोटरबाट पानी तानेर रोपाईँ गर्नुपर्ने बाध्यता भएको छ । मोटरबाट पानी पटाउने क्रममा लगातार घटना भएको छ। यसैबीच आमजनता पार्टीका अध्यक्ष तथा पूर्वमन्त्री प्रभु साहले मौलापुर नगर प्रवक्ता बैठाको निधन प्रति गहिरो दुःख प्रकट गरेका छन्।
उनले सामाजिक सञ्जाल फेसबुकमा लेखेका छन् विद्युत प्राधिकरणको लापरवाहीले भएको यस दुःखद घटनाको दोषीलाई कानुन बमोजिम कारबाही सहित पीड़ित परिवारलाई उचित क्षतिपूर्तिको माग गर्दछु । साथै मृतकप्रति भावपुर्ण श्रद्धांजलि एवं शोकाकुल परिवारजनमा गहिरो संवेदना व्यक्त गर्दछु ।
प्रतिक्रिया दिनुहोस् !