७ साउन,बारा । नेपाल पत्रकार महासंघले बाराको सुवर्ण गाउँपालिकाका अध्यक्ष राजेश यादवले सामाजिक सञ्जालमार्फत पत्रकारलाई लाञ्छित गरेको घटनाप्रति गम्भीर आपत्ति जनाएको छ।
महासंघको केन्द्रीय समितिले आज एक प्रेस विज्ञप्ति जारी गर्दै अध्यक्ष यादवको अभिव्यक्ति प्रेस स्वतन्त्रता विरोधी रहेको बताएको छ।
महासंघको बारा शाखाले दिएको जानकारीअनुसार, यही साउन ६ गते मंगलबार अध्यक्ष यादव सम्बन्धित समाचार प्रकाशित भएपछि उनले सामाजिक सञ्जालमा पत्रकारलाई बदनाम र अपमानित गराउने खालका धारणा व्यक्त गरेका थिए।
विज्ञप्तिमा भनिएको छ, “प्रकाशित समाचारप्रति गुनासो भए कानुनी या विधिसम्मत प्रक्रियामा जान सकिनेमा सो नगरी सार्वजनिक पदधारी व्यक्तिबाट प्रेस स्वतन्त्रता विरोधी कार्य भएकोमा महासंघ आपत्ति प्रकट गर्दछ।”
नेपाल पत्रकार महासंघले पत्रकारलाई धम्क्याउनेमाथि कानुनबमोजिम कारबाही गर्न र प्रेस स्वतन्त्रताको सम्मान गर्न सम्बन्धित निकायसँग जोडदार माग गरेको छ।
महासंघका महासचिव रामप्रसाद दाहाल द्वारा हस्ताक्षरित विज्ञप्तिमा यस्ता घटनाले पत्रकारिता पेशाको मर्यादामाथि आँच पुर्याउने उल्लेख छ। यसैगरी नेपाल पत्रकार महासंघ मधेश प्रदेश समिति र नेपाल पत्रकार महासंघ बारा शाखाले छुट्टा छुट्टै बिज्ञ्पति निकालेकाे छ ।
प्रतिक्रिया दिनुहोस् !