६ साउन,बारा । लोकतन्त्रमा जनताको सेवाका लागि चुनिएका जनप्रतिनिधिबाटै जनतामाथि अपमानजनक व्यवहार हुनु विडम्बनापूर्ण छ।
यस्तै एक गम्भीर घटनामा सुवर्ण गाउँपालिकाका अध्यक्ष राजेश यादवमाथि सार्वजनिक स्थानमै मदिराको सुरमा कलैया उपमहानगरपालिका–३, गङ्गापुरका विकास साहलाई हातपात गर्ने प्रयास गरेको आरोप लागेको छ।
पीडित विकास साहका अनुसार, उनी सामान्य कामको सिलसिलामा कलैया–गढीमाई सडकअन्तर्गत यामाहा शोरुमअगाडि बाटो काट्दै थिए।
सोही क्रममा गाउँपालिका अध्यक्ष यादव चढेको मधेश प्रदेश ०३–००१ च ७७२२ नम्बरको स्कार्पियो गाडीको पछाडिको टायर आफैँ पड्कियो। तर, अध्यक्ष यादवले आफ्नो बाइकले छोएर टायर पड्केको भन्दै आफूमाथि दुर्व्यवहार गरेको साहको आरोप छ। साहले अध्यक्ष यादवले आफ्नो पद र शक्तिको दम्भ देखाएर आफूलाई हप्काउन खोजेको र यसबाट आफू मानसिक रूपमा प्रताडित भएको बताएका छन्।
स्थानीय नागरिकहरूले यस घटनाप्रति तीव्र असन्तुष्टि व्यक्त गरेका छन्। “हामीले भोट दिएर सेवा गर्न पठाएका जनप्रतिनिधि आजभोलि सेवाग्राही र आम जनतालाई तुच्छ व्यवहार गर्न थालेका छन्,” एक स्थानीयले तितो अनुभव सुनाए। पीडित साहले गाउँपालिका अध्यक्षजस्तो जिम्मेवार व्यक्तिले दिउँसै मदिरा सेवन गरी सदरमुकाममा चिच्याउने, धम्काउने र हातपात गर्न खोज्नुले गाउँपालिकाको इज्जत धुमिलिएको गुनासो गरेका छन्।
उनले अध्यक्षले ‘पावर’को भरमा थुन्न लगाउने धम्की दिएको भन्दै आफू असुरक्षित महसुस गरेको पनि बताए।
घटनाका प्रत्यक्षदर्शी स्थानीय ट्राफिक प्रहरीले पनि अध्यक्षको प्रभावमा परेर पीडितको कुरा नसुनी उल्टै हप्काएको आरोप पीडितले लगाएका छन्।
सुवर्ण गाउँपालिकाका जनप्रतिनिधिले देखाएको यो व्यवहार स्थानीय शासनमा देखिएको विकृति र चरम दुरुपयोगको ज्वलन्त उदाहरण हो। जनताको सेवामा समर्पित हुनुपर्ने अध्यक्ष नै जब जनतामाथि हातपातमा उत्रन्छन् भने लोकतन्त्र र स्थानीय शासनको औचित्यमाथि गम्भीर प्रश्न उठ्छ ।यस बिषयमा जानकारी लिने प्रयास गर्दा अध्यक्ष यादव सम्पर्कमा आउन चाहेनन ।
प्रतिक्रिया दिनुहोस् !