६ साउन,बारा । रौतहटमा लागूऔषध तस्करीका लागि तस्करहरूले नयाँ माध्यमहरूको प्रयोग बढाएको संकेत देखिएको छ।
मंगलबार बिहान चन्द्रनिगाहपुरबाट गौरतर्फ जादै गरेको ग ३ च ६७९६ नम्बरको ब्रेजा कार बाट गरुडा प्रहरीले ठूलो परिमाणमा प्रतिबन्धित लागूऔषध गाँजा बरामद गरेको छ। प्रहरीले कारसहित गाँजा नियन्त्रणमा लिएको भए पनि चालक भने फरार भएका छन्।
जिल्ला प्रहरी कार्यालय रौतहटले दिएको जानकारी अनुसार, गस्तीमा रहेको प्रहरी टोलीले गरुडास्थित झाझ पुल नजिकै शंकास्पद अवस्थामा उक्त गाडीलाई रोक्न खोज्दा चालकले गाडी भगाउने प्रयास गरेका थिए। प्रहरीले केही दुरीसम्म पिछा गरेपछि चालकले गाडी छाडेर झाडीतर्फ भागेका हुन्।
प्रहरीले क्रेनको मदतले कारलाई निकालेको थियो। गाडीको खानतलासी गर्दा गाडीभित्र प्लास्टिकका बोराहरूमा प्याक गरिएको ठूलो परिमाणको अवैध गाँजा फेला परेको प्रहरीले बताएको छ। यद्यपि, बरामद गाँजाको यकिन परिमाण, तौल र बजार मूल्यबारे अनुसन्धान भइरहेको छ।
प्रहरीका अनुसार तस्करहरूले अब परम्परागत तरिकाका साथै सवारी साधनको प्रयोग गरेर पनि लागूऔषध ओसारपसार गर्न थालेको बताएका छन्।
प्रहरीले घटनाको थप अनुसन्धान गरिरहेको र फरार चालकको पहिचान तथा पक्राउका लागि खोजी अभियान चलाइएको जानकारी दिएको छ।
पछिल्लो समय सीमावर्ती क्षेत्रहरूमा लागूऔषध कारोबार बढेको गुनासो आइरहेका बेला यो घटनाले प्रहरीलाई थप चुनौती थपेको छ।
प्रतिक्रिया दिनुहोस् !