ईर्साद अन्सारी
२ साउन,काठमाडौँ । नेकपा एकीकृत समाजवादीमा भर्खरै प्रवेश गरेका कम्युनिष्ट नेता वामदेव गौतमले आफू सय वर्षको नहुँदासम्म कम्युनिष्ट आन्दोलनलाई अगाडि बढाउने र सबै विभाजित शक्तिलाई एकताबद्ध गर्ने दृढता व्यक्त गरेका छन्। पार्टी एकता घोषणा सभामा बोल्दै उनले आफूलाई सय वर्षसम्म बाँच्ने महसुस भएको बताए।
गौतमले विभाजित कम्युनिष्ट पार्टीहरूलाई फेरि एउटै बनाउने प्रयास कहिल्यै नछाड्ने प्रतिबद्धता व्यक्त गरे। उनले एमाले र माओवादीबीचको अघिल्लो एकतामा आफू जति खुसी अरू कोही नभएको स्मरण गर्दै त्यसको असफलताप्रति भने दुःख व्यक्त गरे।
“चार वर्ष पहिले म आउन पाएको भए समाजवाद हुन्थ्यो। किनभने म लागेपछि हुन्छ,” उनको आत्मविश्वास झल्कने भनाइ थियो, “म लागेपछि समाजवाद निर्माण हुन्छ। सबैको साथमा लाग्ने हो, एक्लै लाग्ने होइन, यो आजको आवश्यकता छ।”
आफू आन्दोलनबाट आएको नेता भएको बताउँदै उनले यसपटक एक्लै नआएको स्पष्ट पारे। “म एक्लै आएको छैन आज। एक्लै आउँदा कहिले पनि सफल भइनँ। चार वर्ष लाग्यो,” उनले थपे, “त्यसो भएर आज म नेकपा एकता राष्ट्रिय अभियानको ७५ सदस्यीय केन्द्रीय कमिटीको समर्थन बोकेर आएको छु।”
वामदेव गौतमको यो नयाँ इनिङले नेपाली कम्युनिष्ट राजनीतिमा कस्तो प्रभाव पार्ला, त्यो भने हेर्न बाँकी नै छ।
प्रतिक्रिया दिनुहोस् !