१ साउन,बारा । बारा जिल्ला अदालतको नाममा नक्कली कागजातहरू तयार पारेर रोक्का राखिएको जग्गा बिक्री गरेको आरोपमा संजित चौधरी पक्राउ परेका छन्। अदालतको छाप, दस्तखत, लेटरप्याड र चलानी नम्बरसमेत किर्ते गरी ठगी कार्यमा संलग्न चौधरीलाई बुधबार पक्राउ गरी जिल्ला प्रहरी कार्यालय, बारामा बुझाइएको छ।
जितपुर सिमरा उपमहानगरपालिका–१ का बासिन्दा मोति धामी थारुका छोरा संजित चौधरीले अदालतको पुरानो फुकुवा आदेशको नक्कल प्रयोग गरी मालपोत कार्यालयबाट रोक्का रहेको जग्गा गैरकानुनी रूपमा फुकुवा गराएर बिक्री गरेका थिए।
श्रेस्तेदार लालबहादुर कार्कीका अनुसार चौधरीले स्क्यानमार्फत अदालतको छाप र दस्तखतको दुरुपयोग गर्दै जालसाजीपूर्ण कागजातहरू तयार पारेका थिए। उनले ती नक्कली कागजातहरू देखाएर सिमरा मालपोत कार्यालयबाट कित्ता नं. ५४३ को ०–७–० क्षेत्रफलको जग्गा दिपेन्द्र कुमार गुप्तालाई बेचेका थिए।
उल्लेखित जग्गा यसअघि पवन साहले चन्द्रिका धामीसँगको विवादका कारण अदालतबाट रोक्का गराएका थिए। रोक्का आदेश कायमै रहँदा चौधरीले नक्कली फुकुवा आदेशका आधारमा उक्त जग्गा अवैध रूपमा बिक्री गरेका हुन्।
प्रारम्भिक बयानमा संजित चौधरीले नक्कली कागजात आफैंले बनाएको स्वीकार गरेका छन्। यस घटनामा संलग्न उनका पिता मोति धामी भने हाल फरार रहेका छन् र प्रहरीले उनको खोजी कार्य तीव्र पारेको जनाएको छ।
प्रहरीका अनुसार अदालतकै नाम दुरुपयोग गरी गरिएको यो जालसाजी गम्भीर प्रकृतिको अपराध हो र यसमा कडा कारबाही हुनेछ।
प्रतिक्रिया दिनुहोस् !