३२ असार,बारा । निजगढ नगरपालिका वडा नं. ७ बाट हराएको बालकृष्ण हुमागाईंको यामाहा मोटरसाइकल (मधेश प्रदेश ०३ प ७५१०) रौतहटबाट बरामद गरिएको छ। यस घटनामा संलग्न तीन जनालाई प्रहरीले पक्राउ गरेको छ।
बालकृष्ण हुमागाईंको उजुरीपछि भएको अनुसन्धानका क्रममा असार ३१ गते निजगढ-७ का चमन मगरलाई नियन्त्रणमा लिई सोधपुछ गर्दा उनले मोटरसाइकल चोरी गरी रौतहट गुजरा नगरपालिका-२ का रोशन मगरलाई बेचेको स्वीकार गरे।
रोशन मगरलाई नियन्त्रणमा लिई थप अनुसन्धान गर्दा उनले उक्त मोटरसाइकल रौतहटको गरुडा नगरपालिका-२ स्थित न्यू राजन वर्कशपका सञ्चालक राम प्रवेश महरालाई रु ३१,००० मा बिक्री गरेको बयान दिए।
ईलाका प्रहरी कार्यालय निजगढ र ईलाका प्रहरी कार्यालय गरुडा, रौतहटको समन्वयमा असार ३१ गते साँझ राम प्रवेश महरा र रोशन मगरलाई नियन्त्रणमा लिई खानतलासी गर्दा बिना नम्बर प्लेटको चोरी भएको मोटरसाइकल फेला परेको हो।
प्रहरीले मोटरसाइकल बरामद गरी चमन मगर, रोशन मगर र राम प्रवेश महरालाई चोरीको अभियोगमा पक्राउ गरी थप अनुसन्धान गरिरहेको ईलाका प्रहरी कार्यालय निजगढका प्रहरी निरीक्षक जीवन लामिछानेले जानकारी दिए।
प्रतिक्रिया दिनुहोस् !