२९ असार,काठमाण्डाैं । विवादित संघीय मामिला तथा सामान्य प्रशासन मन्त्री राजकुमार गुप्ताले हालै सार्वजनिक भएको अडियोकाण्डमा उल्लेख भएको पैसा भैँसेपाटीस्थित मन्त्री क्वार्टरमै भेटिएको स्वीकारेका छन् ।
प्रधानमन्त्री केपी शर्मा ओलीलाई मौखिक स्पष्टीकरण दिँदै मन्त्री गुप्ताले पैसा क्वार्टरमै भेटिएको स्वीकारेका हुन् । यद्यपि, सो पैसा आफूलाई फसाउनका लागि क्वार्टरमा छाडेर त्यसअनुसारको अडियो रेकर्ड गरिएको हुन सक्ने उनको दाबी छ ।
सरुवा र नियुक्ति विषयमा ७८ लाख रुपैयाँको डिल गरेको विषय बाहिरिएपछि उनीविरुद्ध ‘एक्सन’ लिने तयारीमा प्रधानमन्त्री ओली लागेका छन् ।
प्रधानमन्त्री ओलीले गुप्तासँग एक चरण कुराकानी गरिसकेका छन् । तर, उनको जवाफ चित्तबुझ्दो नभएपछि ओलीले कडा कदम चाल्ने तयारी गरेको प्रधानमन्त्रीनिकट स्रोतले जानकारी दियो ।
यो विषय बाहिरिएपछि प्रधानमन्त्रीले के भएको हो भनेर मन्त्रीसँग पनि सोधपुछ गर्नुभएको छ । मन्त्रीज्यूले क्वार्टरमा पैसा छाडेर आफूअनुकूल अडियो रेकर्ड गराएर गएका हुन् भन्ने जवाफ दिनुभएको छ,’ प्रधानमन्त्रीनिकट स्रोतले भन्यो, ‘तर, विषय पेचिलो बनेपछि प्रधानमन्त्री संघीय मामिला मन्त्रीविरुद्ध एक्सन लिने तयारीमा हुनुहुन्छ । शायद, झापाबाट फर्किएपछि कुनै कदम चाल्नुहुन्छ ।’
स्रोतका अनुसार उक्त अडियो गएको पुस २८ गतेको हो । मन्त्रीको जवाफ चित्तबुझ्दो नभएपछि प्रधानमन्त्री ओलीले राजीनामा गराउने तयारी गरेको स्रोतले बतायो । ‘मन्त्री विवादित भएपछि केही निर्णय आउन सक्छ । झापाबाट फर्किएपछि आवश्यक कदम चाल्नहुन्छ,’ प्रधानमन्त्रीनिकट स्रोतले थप्यो, ‘एकपटक सोधपुछ गरिसक्नुभएको छ । तर, चित्तबुझ्दो जवाफ नआएकाले राजीनामा नै गराउनेसम्मको तयारी हुनसक्छ ।’
मन्त्री गुप्ताले यस प्रकरणमा नागरिक उन्मुक्ति पार्टीकी अध्यक्ष रञ्जिता श्रेष्ठलाई समेत मुछेका छन् ।
श्रेष्ठले ल्याएका मान्छेले आफूलाई फसाउन पैसा छाडेर गएको दाबी मन्त्री गुप्ताले प्रधानमन्त्रीसँग गरेका थिए ।
पूर्व भूमि व्यवस्था मन्त्री अघि–पछि पनि कर्मचारीको सरुवा/बढुवाका लागि आइरहन्थिन् । त्यस दिन पनि बिहान ६ बजे नै भेट्नुपर्यो भनेपछि समय दिएको मन्त्रीले बताउनुभएको छ,’ स्रोतले भन्यो, ‘पूर्वमन्त्रीले भेट्नुपर्यो भनेपछि समय नदिने कुरा पनि भएन । बारम्बार सरुवाको कुरा लिएर आइरहने भएकाले मैले गर्न सक्दिनँ भनेपछि मन्त्री क्वार्टरमा पैसाको पोको छाडेर हिँडेको दाबी मन्त्रीले गर्नुभएको छ ।’
गुप्ताले बिहान ६ बजे नै रञ्जिता र उनका मान्छेले मन्त्री क्वार्टरमा आएर पैसा छाडेर फसाउन खोजेको आरोप लगाएको स्रोतले बतायो ।
बिहान ६ बजे नै उनले अर्को मान्छेलाई ल्याएकी थिइन् । मन्त्रीको भेटघाट कक्षमा भेट गरेपछि ती मान्छेहरूले पैसाको झोला छाडेर गएका हुन् भन्नुभएको छ,’ स्रोतले भन्यो, ‘उनीहरू हिँडेपछि मन्त्रीको सचिवालय, आर्मी र सेक्युरिटीले पैसाबारे त्यो टोलीसँग कुराकानी गरेको बताउनुभएको छ । यसै क्रममा उनीहरूले अहिले यति छाडेका छौं, काम बनेपछि अरू आउँछ भनेर आफू अनुकूल अडियो बनाएर सार्वजनिक गरेका हुन् भन्नुभएको छ ।’
मन्त्री गुप्ताले मालपोत कार्यालय कास्कीका तत्कालीन प्रमुखको सरुवा रोक्नका लागि ५३ लाख र भूमि आयोग कास्कीका जिल्ला अध्यक्ष नियुक्तिका लागि २५ लाख गरी ७८ लाख रुपैयाँ लेनदेन गरेको अडियो सार्वजनिक भएको थियो ।
उजुरी परेपछि अख्तियार दुरुपयोग अनुसन्धान आयोगले पनि यो विषयमा छानबिन गरिरहेको छ । यो विषयमा संसदमा पनि प्रश्न उठेको छ ।
आइतबार बसेको प्रतिनिधिसभा बैठकको शून्य समयमा माओवादी केन्द्रकी सांसद ज्ञानु बस्नेत सुवेदीले दुईजना मन्त्रीको नाम जोडिएको गम्भीर भ्रष्टाचार मुद्दाको छानबिनका लागि सरकारको ध्यानाकर्षण गराएकी थिइन् । यो विषयमा गुप्तासँगै भूमि व्यवस्था, सहकारी तथा गरिबी निवारण मन्त्री बलराम अधिकारीको नाम पनि जोडिएको छ ।
केही पत्रपत्रिका र सामाजिक सञ्जालमा संघीय मामिला तथा सामान्य प्रशासन मन्त्री राजकुमार गुप्ताले कास्कीका तत्कालीन मालपोत कार्यालय प्रमुखको सरुवा र भूमि आयोगको अध्यक्ष नियुक्तिमा ७८ लाख घुस डिल गरेको घटना बाहिर आएको छ,’ सांसद सुवेदीले भनिन्, ‘यसमा भूमि व्यवस्था मन्त्री बलराम अधिकारीको समेत नाम मुछिएको छ । गम्भीर भ्रष्टाचार मुद्दामा दुईजना मन्त्रीको नाम मुछिँदा सरकार मौन छ । भ्रष्टाचारीको मुख हेर्दिनँ भनेर सुशासनको नारा लगाउने प्रधानमन्त्री के गर्दै हुनुहुन्छ ? यो प्रकरणको सत्य तथ्य छानबिन र दोषीमाथि कारबाहीका लागि माग गर्दछु ।’
मन्त्री गुप्ताले घुस बार्गेनिङ गरेको अडियोबारे विभिन्न टीकाटिप्पणी भइरहेका छन् । मन्त्री गुप्ताले भने सो अडियो एआई प्रयोग गरेर बनाइएको दाबी गरेका छन् ।
सामाजिक सञ्जालमा सन्देश लेख्दै उनले आरोप प्रमाणित गर्न चुनौती दिएका छन् ।
उनी पर्सा क्षेत्र नम्बर- ३ बाट प्रत्यक्ष निर्वाचित नेकपा एमालेका सांसद हुन् ।साभार-लाेकान्तर
प्रतिक्रिया दिनुहोस् !