२४ असार,बारा । बारा प्रहरीले साेमबार साझ प्रतिबन्धित लागूऔषध एम्पुलसहित एक जनालाई नियन्त्रणमा लिएको छ।
जिल्ला प्रहरी कार्यालय बाराबाट खटिएको प्रहरी सहायक निरीक्षक नन्द किशोर सिंहको कमान्डमा रहेको टोलीले विशेष सूचनाका आधारमा कलैया उप-महानगरपालिका वडा नम्बर ५, भरतचोकस्थित मटिअर्वा जाने बाटोबाट एक जनालाई पक्राउ गरेको हो।
पक्राउ पर्नेमा बाराको जीतपुर सिमरा उप-महानगरपालिका वडा नम्बर ७ बस्ने करिब २० वर्षीय सेराज अंसारी रहेका छन्। प्रहरीका अनुसार अंसारीले दुई वटा आँपको क्यारेट राखी सोही स्थानमा उभिएका थिए।
प्रहरीलाई देखेपछि भाग्न खोज्दा शंका लागी उनलाई नियन्त्रणमा लिई क्यारेट खोलेर हेर्दा आँपमुनि लुकाएर राखेको अवस्थामा ठूलो परिमाणमा प्रतिबन्धित लागूऔषध बरामद भएको थियो।
बरामद लागूऔषधमा नोफिन १५०० पिस, फेनारगन १५०० पिस र डाईजोपाम १५०० पिस गरी कुल ४५०० पिस (१५ पोका) एम्पुल रहेको प्रहरीले जनाएको छ। घटनाबारे थप अनुसन्धान भइरहेको जिल्ला प्रहरी कार्यालय, बाराले जारी गरेको प्रेस विज्ञप्तिमा उल्लेख छ।
प्रतिक्रिया दिनुहोस् !