२३ असार,बारा । बृहत्तर जनकपुर क्षेत्र विकास परिषद्का अध्यक्ष शीतल साह हस्ताक्षर किर्ते गरेको आरोपमा पक्राउ परेका छन्। लामो समयदेखि फरार रहेका उनलाई धनुषा प्रहरीले सोमबार जनकपुरबाटै नियन्त्रणमा लिएको हो।
धनुषाका प्रहरी प्रवक्ता, डिएसपी बरुणबहादुर सिंहका अनुसार परिषद्का कार्यकारी निर्देशक बैजनाथ पासवानको हस्ताक्षर किर्ते गरी कर्मचारी बर्खास्त गरेको उजुरीपछि साहमाथि अनुसन्धान सुरु गरिएको थियो।
घटना विवरण अनुसार, अध्यक्ष साहले प्रशासकीय अधिकृत जितेन्द्र यादव, लेखापाल सावित्री गिरी र नायब सुब्बाहरू मदन चौधरी तथा सञ्जय मण्डललाई बर्खास्त गर्न निर्देशक पासवानको नक्कली हस्ताक्षरसहितको पत्र तयार पारी उच्च अदालतमा पेश गरेका थिए।
तर, निर्देशक पासवानले उक्त हस्ताक्षर आफ्नो नभएको भन्दै अदालत र प्रहरीमा किर्ते तथा जालसाजीको उजुरी दिएपछि प्रहरीले घटनाको अनुसन्धान सुरु गरेको थियो। विधि विज्ञान प्रयोगशालामा जाँच गर्दा उक्त हस्ताक्षर किर्ते गरेको पुष्टि भएपछि प्रहरीले साहविरुद्ध मुद्दा दर्ता गरेको थियो र त्यसयता उनी फरार थिए।
पक्राउ परेका साहलाई सोमबार नै जिल्ला अदालत धनुषामा पेश गरी अनुसन्धानका लागि तीन दिनको म्याद थप गरिएको डिएसपी सिंहले जानकारी दिए।
राजनीतिक पृष्ठभूमिमा नेकपा (एकीकृत समाजवादी) को सिफारिसमा परिषद्का अध्यक्ष नियुक्त भएका साह केही समयअघि पार्टी परित्याग गरी नेकपा (एमाले) मा प्रवेश गरेका थिए। यस गिरफ्तारीले जनकपुरको राजनीतिक तथा सामाजिक वृत्तमा थप हलचल ल्याएको छ।
प्रतिक्रिया दिनुहोस् !