१०असार,काठमाण्डाैं । भिजिट भिसा प्रकरणको छानबिनका लागि मन्त्रिपरिषद्ले गठन गरेको समिति राष्ट्रिय स्वतन्त्र पार्टी (रास्वपा) ले अस्वीकार गर्ने भएको छ। पार्टीका प्रवक्ता मनिष झाका अनुसार, छानबिन समिति गठन प्रक्रियामै त्रुटि रहेको र गृहमन्त्री आफैं आरोपित भएकाले उनले प्रस्ताव गरेको समिति निष्पक्ष हुन नसक्ने रास्वपाको अडान छ।
रास्वपाले गृहमन्त्रीको राजीनामा र निष्पक्ष छानबिनको माग गर्दै संसद बैठकमा वेल घेराउ तथा बहिष्कार गर्दै आएको छ। आजको संसद बैठकमा बजेट पारित गर्ने कार्यसूची रहे पनि रास्वपा यस प्रक्रियामा सहभागी नहुने प्रवक्ता झाले स्पष्ट पारेका छन्।
समिति गठनमा रास्वपाको आपत्ति:
रास्वपाले पूर्व मुख्य सचिव शंकरदास वैरागीको संयोजकत्वमा बनेको छानबिन समितिको गठन प्रक्रियामै गम्भीर आपत्ति जनाएको छ। प्रवक्ता झाका अनुसार, “आरोपित आफैंले आफूमाथि छानबिन गर्न समिति बनाउनु अस्वाभाविक छ। यो केवल गृहमन्त्रीलाई ‘सुनपानी छर्किन’ गरिएको प्रपञ्च मात्र हो। हामी यसलाई स्वीकार गर्दैनौं।”
साथै, रास्वपाले छानबिनको माग गर्ने प्रमुख दलसँग कुनै छलफल नगरी एकतर्फी रूपमा समिति गठन गरिएकोमा पनि असन्तुष्टि व्यक्त गरेको छ। यसले समितिको निष्पक्षतामाथि प्रश्न उठेको रास्वपाको भनाइ छ।
संयोजक वैरागीको योग्यतामाथि प्रश्न:
प्रवक्ता झाले छानबिन समितिका संयोजक शंकरदास वैरागीको ‘नैतिक पृष्ठभूमि’ र ‘राजनीतिक नियुक्ति’ को अपेक्षामाथि पनि प्रश्न उठाएका छन्। उनले भने, “उहाँ आफैं बलियो नैतिक पृष्ठभूमि भएको व्यक्ति होइन। त्यसमाथि अहिले कता राजनीतिक नियुक्ति पाइन्छ भनेर पर्खेर बस्नुभएको छ। अनि उहाँले सरकारका गृहमन्त्रीमाथि निष्पक्ष छानबिन गर्नुहुन्छ भनेर हामीले विश्वास गरिदिनुपर्ने?”
रास्वपा संसदीय दलको अनौपचारिक बैठक अहिले बसिरहेको छ। बैठकले आजको संसद बैठकमा कसरी प्रस्तुत हुने भन्ने विषयमा निर्णय लिनेछ। वेल घेराउ गर्ने, बहिष्कार गर्ने वा विरोधका अन्य स्वरूपमा जाने भन्नेबारे छलफल भइरहेको झा बताउँछन्।
समितिलाई छानबिनका लागि एक महिनाको समय दिइएको छ भने सम्बन्धित मन्त्रालयका सहसचिवहरू यसमा सदस्य रहनेछन्। यद्यपि, रास्वपाको अडानले संसदमा थप गतिरोध निम्त्याउने सम्भावना बढेको छ।
प्रतिक्रिया दिनुहोस् !