प्रहरीको ढिलासुस्ती र पूर्वप्रदेश प्रमुखको फरार प्रकरण: पीडितले कहिले पाउँछन् न्याय?

८ असार,काठमाण्डाैं । मधेस प्रदेशका पूर्वप्रमुख राजेश झा अहिराज बलात्कार आरोपमा पक्राउ पुर्जी जारी भएको दुई महिना बितिसक्दा पनि अझै फरार छन्।

काठमाडौंको बानेश्वरमा एक युवतीमाथि बलात्कार गरेको आरोप लागेका अहिराजलाई प्रहरीले सक्रियताका साथ खोजी गरिरहेको दाबी गरे पनि अहिलेसम्म फेला पार्न सकेको छैन। प्रहरी स्रोतका अनुसार पक्राउ पुर्जी जारी भएको खबर पाएपछि उनी भारत भागेको हुनसक्छन्।

* घटनाक्रममा प्रहरीको ढिलाइ
राजेश झा अहिराजविरुद्धको जाहेरी जिल्ला प्रहरी परिसर काठमाडौंमा २०८० माघ ३ गते नै दर्ता भएको थियो। तर, जाहेरी दर्ता भएपछि पनि प्रहरीले अदालतबाट तत्काल पक्राउ अनुमति लिएन। अदालत स्रोतका अनुसार प्रहरीले २०८० चैत २५ गते मात्र जिल्ला अदालत काठमाडौंबाट पक्राउ अनुमति लिएको थियो। यही ढिलाइको फाइदा उठाउँदै अहिराज फरार भएका हुन्।

* बलात्कार र धम्कीको आरोप
पीडित युवतीका अनुसार घटना २०८१ जेठ ४ गतेको हो। अहिराजले आफ्नो कोठामा कोही नभएको मौका पारी पटकपटक बलात्कार गरेको आरोप छ। बलात्कारपछि यो घटना कसैलाई बताएमा मार्ने धम्की समेत दिएको पीडितले बताएकी छन्।

* न्यायको खोजीमा पीडितको संघर्ष
बलात्कारको घटना भएको केही समयपछि पीडित जिल्ला प्रहरी परिसर काठमाडौं पुगेकी थिइन्। तर, प्रहरीले उनको जाहेरी दर्ता गर्न नमानेको पीडितको आरोप छ। पटकपटकको प्रयासपछि पनि जाहेरी दर्ता गर्न इन्कार गरेपछि पीडित युवती जिल्ला सरकारी वकिलको कार्यालय काठमाडौं पुगेकी थिइन्।

उनले २०८० कात्तिक २८ गते जिल्ला सरकारी वकिलको कार्यालयमा जाहेरी निवेदन दिएकी थिइन्। त्यसपछि सरकारी वकिलको कार्यालय काठमाडौंले २०८० कात्तिक ३० गते प्रहरी परिसरलाई जाहेरी दर्ता गर्न पत्राचार गरेको थियो। सरकारी वकिलको कार्यालयले पत्राचार गरेको केही महिनापछि, अर्थात् २०८० माघमा मात्र, प्रहरीले उक्त जाहेरी दर्ता गरी प्रक्रिया अघि बढाएको थियो।

* पूर्वप्रदेश प्रमुखको पृष्ठभूमि
राजेश झा अहिराज २०७७ फागुन ७ देखि २०७८ साउन ३२ सम्म मधेस प्रदेश प्रमुख थिए। उच्च ओहोदामा रहेका व्यक्तिविरुद्ध यस्तो गम्भीर आरोप लागेपछि र पक्राउ पुर्जी जारी भए पनि फरार रहँदा न्याय प्रक्रियामाथि प्रश्न उठेको छ।
एसपी अपिलराज बोहराले अहिराजको खोजी जारी रहेको बताए पनि दुई महिना बितिसक्दा पनि पक्राउ पर्न नसक्नुले प्रहरीको कार्यशैलीमाथि प्रश्न खडा भएको छ। पीडितले न्याय पाउन अझै कति संघर्ष गर्नुपर्ने हो, त्यो हेर्न बाँकी नै छ।