८ असार,काठमाण्डाैं । इजरायल र इरानबीच चलिरहेको युद्धका माझ संयुक्त राज्य अमेरिकाले इरानका फोर्दो, नतान्ज र एस्फाहान परमाणु केन्द्रहरूमा हवाई आक्रमण गरेको छ।
अमेरिकी राष्ट्रपति डोनाल्ड ट्रम्पले यस आक्रमणको पुष्टि गर्दै फोर्दोमा सम्पूर्ण बम पेलोड खसालिएको जानकारी दिएका छन्।
ट्रम्पले आक्रमणमा संलग्न अमेरिकी विमानहरू इरानी हवाई क्षेत्रबाट सकुशल बाहिरिसकेको र सुरक्षित रूपमा आफ्नो आधारमा फर्कंदै गरेको बताए।
उनले अमेरिकी सेनाको प्रशंसा गर्दै विश्वमा यस्तो क्षमता भएको अर्को कुनै सेना नभएको दाबी गरे। राष्ट्रपति ट्रम्पले अब शान्तिको समय आएको पनि उल्लेख गरेका छन्।
इजरायलले जुन १३ देखि इरानविरुद्ध आक्रमण सुरु गरेको थियो र हालसम्म १० इरानी न्युक्लियर वैज्ञानिक, तीन सेना कमाण्डर र चार जवानको हत्या गरिसकेको जनाएको छ।
यस द्वन्द्वका कारण इरानमा ठूलो मानवीय क्षति भएको छ।
अमेरिकास्थित ह्युमन राइट्स एक्टिभिस्ट न्युज एजेन्सीका अनुसार जुन १३ देखि हालसम्म इरानमा ६५७ जनाको मृत्यु भइसकेको छ भने २००० भन्दा बढी घाइते भएका छन्। यद्यपि, इरानको स्वास्थ्य मन्त्रालयले ४३० जना नागरिक मारिएको र ३,५०० भन्दा बढी घाइते भएको पुष्टि गरेको छ।
यसैबीच, इरानले गरेको आक्रमणबाट इजरायलमा २४ जनाको मात्र मृत्यु भएको दाबी गरिएको छ। यस अमेरिकी आक्रमणले मध्यपूर्वमा थप तनाव बढाउने सम्भावना देखिएको छ।
प्रतिक्रिया दिनुहोस् !