१ असार,काठमाण्डाैं । भारतको उत्तराखण्ड राज्यमा अवस्थित प्रसिद्ध धार्मिक स्थल केदारनाथ जाने क्रममा भएको एक हेलिकप्टर दुर्घटनामा पाँच जनाको ज्यान गएको छ। आज बिहान आर्यन कम्पनीको उक्त हेलिकप्टर त्रिजुगीनारायण नजिकै, गौरीकुण्ड क्षेत्रमा दुर्घटनाग्रस्त भएको हो।
दुर्घटनामा हेलिकप्टरमा सवार सबै पाँच जनाको मृत्यु भएको पुष्टि गरिएको छ, जसमा एक बालक पनि सामेल छन्। प्रारम्भिक जानकारी अनुसार, हेलिकप्टर देहरादूनबाट केदारनाथतर्फ जाँदै गर्दा मौसम एक्कासी बिग्रिएपछि यो दुर्घटना भएको अनुमान गरिएको छ।
घटनास्थलमा स्थानीय प्रशासन, प्रहरी र उद्धार टोली तत्काल पुगेका छन्। खराब मौसमका कारण उद्धार कार्यमा केही चुनौती देखिए पनि प्रयासहरू जारी छन्।
केदारनाथ धार्मिक यात्राको सिजन सुरु भएको समयमा भएको यो दुर्घटनाले यात्रु सुरक्षाप्रति गम्भीर चिन्ता बढाएको छ। भारतीय अधिकारीहरूले दुर्घटनाको विस्तृत छानबिन थाल्ने बताएका छन्।
पटकपटकको दुर्घटनाले सुरक्षामा प्रश्न:
केदारनाथ क्षेत्रमा हेलिकप्टर दुर्घटनाको यो पहिलो घटना भने होइन। यसअघि पनि केदारनाथ यात्राका क्रममा हेलिकप्टर दुर्घटना भई मानवीय क्षति भएको थियो। गत वर्ष अक्टोबरमा पनि केदारनाथबाट फाटा फर्कँदै गरेको एक हेलिकप्टर दुर्घटना हुँदा ७ जनाको ज्यान गएको थियो।
लगातारको यस्ता दुर्घटनाले यस क्षेत्रमा सञ्चालित हवाई सेवाहरूको सुरक्षा मापदण्ड र तिनको पालनाबारे गम्भीर प्रश्न उठाएको छ।
प्रतिक्रिया दिनुहोस् !