२२ जेठ,काठमांडाै । नेपालको राजनीतिक इतिहासमा आज एउटा कालो दिनको रूपमा दर्ज भएको छ। पूर्वप्रधानमन्त्री तथा नेकपा (एकीकृत समाजवादी) का अध्यक्ष माधवकुमार नेपालविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेसँगै उनको सांसद पद स्वतः निलम्बनमा परेको छ।
यस घटनाले नेपाली राजनीतिमा भूकम्प ल्याएको छ भने उच्च पदस्थ व्यक्तिहरू समेत कानुनको दायरामा आउने संकेत दिएको छ।
अख्तियारको ऐतिहासिक कदम:
अख्तियार दुरुपयोग अनुसन्धान आयोगले बिहीबार पतञ्जलि योगपीठको जग्गा सट्टापट्टा प्रकरणमा भएको गम्भीर अनियमिततालाई लिएर पूर्वप्रधानमन्त्री नेपालविरुद्ध मुद्दा दायर गरेको हो।
अख्तियारको यो कदमलाई नेपालको इतिहासमा पहिलो पटक कुनै पूर्वप्रधानमन्त्रीविरुद्ध भ्रष्टाचार मुद्दा चलाइएकोले ‘ऐतिहासिक’ मानिएको छ।
यसअघि अख्तियारको काम कारबाहीमा राजनीतिक दबाबको आरोप लाग्ने गरेपनि यस पटकको निर्णयले अख्तियारको विश्वसनीयतामा वृद्धि हुने अपेक्षा गरिएको छ।
सांसद पद निलम्बन र संसदको भूमिका:
नेपालविरुद्ध मुद्दा दायर भएसँगै उनको सांसद पद स्वतः निलम्बनमा परेको छ। अख्तियारले संसद् सचिवालयमा पठाएको पत्र सभामुख देवराज घिमिरेले प्रतिनिधिसभाको बिहीबारको बैठकमा पढेर सुनाएका छन्। यो घटनाले संसदभित्र र बाहिर नैतिकताको प्रश्न खडा गरेको छ। एक पूर्वप्रधानमन्त्री नै भ्रष्टाचारको आरोपमा मुद्दा खेप्नुपर्ने अवस्था आउनुले देशको सुशासनमाथि नै गम्भीर प्रश्नचिह्न खडा भएको छ।
के हो पतञ्जलि जग्गा सट्टापट्टा प्रकरण?
अख्तियारले बिहीबार विशेष अदालतमा मुद्दा दर्ता गरेको पतञ्जलि जग्गा सट्टापट्टा प्रकरणमा पूर्वप्रधानमन्त्री नेपालमाथि अनियमितताको आरोप लागेको छ। विस्तृत अनुसन्धानले यस प्रकरणमा कस-कसको संलग्नता छ र कति अर्बको हिनामिना भएको छ भन्ने कुरा खुलाउने छ। छानबिन न्युज डटकमले यस प्रकरणको गहिराइमा पुगेर थप तथ्यहरू सार्वजनिक गर्नेछ।
नैतिकताको प्रश्न र राजनीतिक भूकम्प:
पूर्वप्रधानमन्त्री नेपालमाथि भ्रष्टाचारको आरोप लागेपछि यसले नेपाली राजनीतिमा नैतिकताको गम्भीर प्रश्न उठाएको छ। भ्रष्टाचार विरुद्ध शून्य सहनशीलताको नारा दिने राजनीतिक दल र नेताहरू यस घटनापछि कसरी प्रस्तुत हुन्छन्, त्यो हेर्न बाँकी नै छ। यस घटनाले आसन्न चुनावमा समेत ठूलो प्रभाव पार्न सक्ने विश्लेषण गरिएको छ।
प्रतिक्रिया दिनुहोस् !