२२ जेठ,बारा । रौतहटको कटहरिया नगरपालिका वडा नम्बर १ भषेडवामा एक नवविवाहित महिलाको शव घरमा मृत अवस्थामा फेला परेको घटनाले समाजमा व्याप्त दाइजो प्रथाको विकराल रूपलाई फेरि एकपटक उजागर गरेको छ।
यही मंगलबार घटेको यस घटनामा परिवारका सदस्यहरूले नै मिलेर हत्या गरेको माइती पक्षले आरोप लगाएको छ।
विजयपुर नगरपालिका–९, बडहरवा निवासी स्व. रामनारायण यादवकी छोरी आल्का यादवको निर्मम हत्या भएको हो। घटनापछि मृतकका श्रीमान् अन्दाजी २६ वर्षीय अङ्केश यादव फरार छन् भने ससुरा पुकार राय यादवलाई प्रहरीले हिरासतमा लिएको छ।
इलाका प्रहरी कार्यालय कटहरियाका वरिष्ठ सई बिनोद राना मगरका अनुसार, मंगलबार बेलुकी करिब ७ बजेको समयमा आल्कालाई कुटपिट गरी घाँटी थिचेर हत्या गरिएको प्रहरीको प्रारम्भिक अनुसन्धानबाट खुलेको छ।
विवाहपछि कटहरिया–१, भसेरवास्थित श्रीमानको घरमा बस्दै आएकी आल्काको हत्या दाइजोकै कारण भएको हुन सक्ने माइती पक्षको दाबी छ। यो घटनाले दाइजो प्रथा कति भयावह रूपमा समाजमा जरो गाडेर बसेको छ भन्ने देखाउँछ।
दाइजोको निसानामा परेर नवविवाहित महिलाले ज्यान गुमाउनु परेको यो पहिलो घटना होइन। यस्ता घटनाहरूले महिला हिंसा र सामाजिक कुरितिबीचको गहिरो सम्बन्धलाई स्पष्ट पार्छ।
दाइजो एउटा यस्तो सामाजिक अभिशाप हो, जसले महिलाको जीवनलाई निरन्तर जोखिममा पार्छ। यसले महिलालाई वस्तुको रूपमा हेर्न प्रोत्साहन गर्छ र उनीहरूको आत्मसम्मानमा आँच पुर्याउँछ। विवाहलाई व्यापार र लेनदेनको माध्यम बनाउने यो कुप्रथाले कैयौं परिवारमा अशान्ति र बिग्रह ल्याएको छ।
गौर अस्पतालमा पोष्टमार्टमका लागि पठाइएको आल्काको शवले हाम्रो समाजलाई दाइजो प्रथाको अन्त्यका लागि कडा कदम चाल्न चुनौती दिएको छ। प्रहरीले अभियुक्तहरूलाई नियन्त्रणमा लिई थप अनुसन्धान गरिरहेको छ, तर कानुनी कारबाहीका अतिरिक्त सामाजिक सचेतना र दाइजोविरुद्धको अभियान अझ सशक्त बनाउनु अपरिहार्य छ।
यस्ता घटनाहरूले हामीलाई दाइजोको नाममा हुने हिंसालाई कुनै पनि हालतमा स्वीकार नगर्न र यसका विरुद्ध एकजुट भएर आवाज उठाउन प्रेरित गर्नुपर्छ। समाजका हरेक वर्ग र समुदायले दाइजोलाई बहिष्कार गरी महिलाको सम्मान र अधिकारको रक्षाका लागि प्रतिबद्ध हुनु आजको आवश्यकता हो।
प्रतिक्रिया दिनुहोस् !