१४ जेठ,काठमाण्डाै । त्रिभुवन अन्तर्राष्ट्रिय विमानस्थल हुँदै हुने भिजिट भिसा तस्करी प्रकरणमा मुछिएका गृह मन्त्रालयका सहसचिव तीर्थराज भट्टराई र उनकी पत्नी देवीमाया बराल (भट्टराई) को अमेरिका प्रवेशका लागि जारी पाँच वर्षे ‘मल्टिपल इन्ट्री’ भिसा रद्द भएको छ।
भट्टराईलाई यात्रुहरूसँग आर्थिक लेनदेन गरी गैरकानुनी रूपमा विदेश पठाउने आरोपमा अख्तियार दुरुपयोग अनुसन्धान आयोगले गत बुधबार नियन्त्रणमा लिएपछि नेपालस्थित अमेरिकी दूतावासले उक्त कदम चालेको हो।
सूत्रका अनुसार, अमेरिकी दूतावासले भिसा रद्द गरिएको जानकारी परराष्ट्र मन्त्रालयलाई औपचारिक रूपमा गराइसकेको छ। “अध्यागमन कानुन कार्यान्वयन गर्ने उच्च पदस्थ अधिकारी नै तस्करीजस्तो गम्भीर अपराधमा संलग्न भएकोप्रति अमेरिकाले गम्भीर चासो देखाउँदै सो निर्णय गरेको हो,” एक अधिकारीले जानकारी दिए।
यसअघि पनि नेपाली नागरिकलाई नक्कली भुटानी शरणार्थी बनाएर अमेरिका पठाउने प्रकरणमा तत्कालीन उपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाण, पूर्वगृह सचिव टेकनारायण पाण्डे, तथा अन्य उच्चपदस्थ व्यक्तिहरूको संलग्नता देखिएपछि अमेरिकाले यस विषयलाई गम्भीर रूपमा लिएको हो।
प्रतिक्रिया दिनुहोस् !