१ मंसिर बारा । बीरगन्जको घण्टाघर चोकमा शुक्रबार राति तस्करीको आशंकामा प्रहरीले ठूलो परिमाणको औषधिसहित एउटा मालबाहक ट्रक नियन्त्रणमा लिएको छ। उक्त ट्रकमा करिब ८७ लाख ६१ हजार ६७० रुपैयाँ मूल्य बराबरको औषधि फेला परेको हो।
जिल्ला प्रहरी कार्यालय पर्साको टोलीले विशेष सूचनाको आधारमा ना.३ ख ६९७१ नम्बरको ट्रकलाई चेकजाँच गरेको थियो। चेकजाँचको क्रममा ट्रकमा रहेको औषधि बीलबिजकमा उल्लेख गरिएको परिमाणभन्दा बढी फेला परेको प्रहरीले जनाएको छ।
पर्साका प्रहरी नायब उपरीक्षक (डीएसपी) दीपक भारतीका अनुसार औषधिको परिमाण र मूल्यमा बीलबिजकसँग मेल नखाएपछि ट्रकलाई तत्काल नियन्त्रणमा लिइएको हो। प्रारम्भिक अनुसन्धानले यो घटना औषधि तस्करीसँग सम्बन्धित हुन सक्ने आशंका गरिएको छ।
नियन्त्रणमा लिइएको ट्रकलाई औषधि र अन्य आवश्यक प्रमाणसहित थप अनुसन्धानका लागि राजश्व अनुसन्धान कार्यालय पथलैया, बारामा पठाइएको छ।
प्रतिक्रिया दिनुहोस् !