२२ असाेज,पर्सा । मकवानपुरको हेटौंडामा तेल ट्यांकरमार्फत भारततर्फ तस्करीको तयारीमा रहेको ३९२ किलो गाँजा प्रहरीले बरामद गरेको छ । त्रिभुवन राजमार्ग हुँदै पालुङबाट वीरगञ्जतर्फ आइरहेको ना ७ ख १७७१ नम्बरको तेल ट्यांकरबाट गाँजा बरामद भएको हो ।
मंगलबार बिहान करिब ३ बजे हेटौंडा उपमहानगरपालिका–१५ रातोमाटेस्थित पूर्व–पश्चिम सडकखण्डमा विशेष सूचनाका आधारमा प्रहरीले ट्यांकर नियन्त्रणमा लिएको थियो । मकवानपुरका प्रहरी नायव उपरीक्षक (डिएसपी) श्यामु अर्यालले तेल ट्यांकरसहित दुई जनालाई पक्राउ गरिएको जानकारी दिएका छन् ।
ट्यांकरका चालक मकवानपुरको मनहरी गाउँपालिका–९ ज्यामिरे घर भएका २६ वर्षीय रोशन पुरी र सहचालक २२ वर्षीय धनबहादुर मल्ललाई पक्राउ गरिएको हो । ट्यांकरका पाँचवटा डिब्बामध्ये तेस्रो डिब्बामा २५ वटा पोका बनाइ गाँजा लुकाएर राखिएको अवस्थामा भेटिएको डिएसपी अर्यालले बताए ।
गाँजाको अवैध तस्करी वीरगञ्जको सीमा क्षेत्रबाट भारतीय बजारसम्म पु¥याउने योजना रहेको आशंका गरिएको छ । मकवानपुरको विकट गाउँ क्षेत्रमा गाँजा उत्पादन हुने गरे पनि यस प्रकारको तस्करी मकवानपुरबाट वीरगञ्ज हुँदै भारतसम्म गरिन्छ। प्रहरीको सक्रियताले गाँजा खेती नष्ट गर्नका लागि अभियान चले पनि तस्करी र उत्पादनमा कमी आएको छैन ।
वीरगञ्ज नेपाल–भारत सीमा नजिकैको प्रमुख नाका भएकाले लागूऔषध तस्करीको उच्च जोखिममा रहेको छ। यो घटनाले सीमा क्षेत्रमा अझ कडा निगरानी आवश्यक रहेको सन्देश दिन्छ, जसले गर्दा लागूऔषधको अवैध कारोबार नियन्त्रणमा सहयोग पुग्न सक्दछ।
प्रतिक्रिया दिनुहोस् !