९ साउन,बारा । आफूलाई नेपाल प्रहरी बताउँदै विभिन्न मानिस तथा व्यापारीहरूसँग मोटरसाकल र रकम ठग्ने एक जनालाई बारा प्रहरीले पक्राउ गरेको छ ।
प्रहरीको आवरणमा ठगी गरेको आरोपमा प्रहरीले बाराको फेटा गाँउपालिका–७ निवासी ४५ वर्षीय सहाबुदिन अंसारीलाई पक्राउ गरिएको हो ।
अंसारसीले गत जेठ ३२ गते साझ ४ बजे जिल्लाको महागढिमाई नगरपालिका–८ जोलगावा निवासी ५५ वर्षीय सिताराम राय यादवलाई आफु नेपाल प्रहरीमा कार्यरत रहेको र इमरजेन्सी भएका कारण मोटरसाइकल आवश्यक परेको भनी ना ४ प २२१२ नम्बरको सुपर स्पलेण्डर मोटरसाइकल लिइ फरार भएका थिए ।
सोही मोटरसाइकल प्रयोग गरी विभिन्न मानिस, व्यापारीसँग रकम उठाइरहेको निवेदन जिल्ला प्रहरी कार्यालयमा आएपछि प्रहरीले नक्कली प्रहरीलाई पक्राउ गरेको जिल्ला प्रहरी कार्यालय बाराका प्रहरी प्रमुख तथा प्रहरी उपरीक्षक महेन्द्र खड्काले बताए ।
इलाका प्रहरी कार्यालय प्रसौनीको प्रहरी टोलीले अन्सारीलाई साउन ७ गते पक्राउ गरेको थियो भने अन्सारीविरुद्ध जिल्ला प्रहरी कार्यालय बाराले चोरी सम्बन्धी कसुरमा मुद्दा दर्ता गरी जिल्ला अदालत बाराबाट पाँच दिनको म्याद थप गरी थप अनुसन्धान कार्य गरिरहेको जिल्ला प्रहरी कार्यालय बाराले जनाएकाे छ ।
प्रतिक्रिया दिनुहोस् !