१० असार,बारा । आफूलाई तपश्वी दाबी गर्ने रामबहादुर बम्जनलाई बाल यौन दुराचारको कसूरमा दोषी ठहर गरिएको छ। जिल्ला अदालत, सर्लाहीका न्यायाधीश जीवनकुमार भण्डारीको इजलासले सोमबार उनलाई दोषी ठहर गरेको स्रेस्तेदार सदन अधिकारीले जानकारी दिएका छन्। उनले भने, “अब १७ असारमा सजाय निर्धारण हुनेछ।”
रामबहादुर बम्जनसँगै तोप्चेङ महात्मा गुरु भनिने ज्ञानकुमार बम्जन र जेबी गुरु भनिने जितबहादुर तामाङ पनि दोषी ठहरिएका छन्। ज्ञानकुमार र जितबहादुरलाई मतियारको रूपमा सजाय मागदाबी गर्दै अदालतमा अभियोग पत्र पेश भएको थियो।
गिरफ्तारी र मुद्दाको विवरण
बम्जनलाई प्रहरीले २४ पुस २०८० मा काठमाडौंबाट पक्राउ गरेको थियो। उनी २०७६ सालदेखि नै प्रहरीको खोजीमा रहेका थिए तर २०८० सालमा मात्रै पक्राउ परेका थिए। सर्लाही अदालतले २७ पुस २०८० मा उनलाई पुर्पक्षका लागि थुनामा पठाउने आदेश दिएको थियो।
थप अभियोग
बम्जनमाथि सर्लाहीकी रिता बोट, नुवाकोटकी कर्मा तामाङ, मकवानपुरकी फुलमाया रुम्बा, सुरेश आले मगर र सञ्चमान बाइला बेपत्ता पारेको अभियोग छ। उनीहरू सबैलाई सिन्धुलीस्थित आश्रमबाट बेपत्ता बनाइएको प्रहरी अनुमान छ।
यौन दुराचार र प्रहरी अनुसन्धान
सर्लाहीस्थित आश्रममा बाल यौन दुराचार भएको जाहेरी थियो। महिला अधिकारकर्मीको सहयोगमा ३० भदौ २०७६ मा ललितपुरमा पत्रकार सम्मेलन गर्दै एक १८ वर्षीया युवतीले बम्जनले पटकपटक बलात्कार गरेको खुलासा गरेकी थिइन्। त्यसपछि प्रहरीमा पनि उजुरी परेको थियो।
२०७६ पुसमा प्रहरीले सिन्धुपाल्चोकस्थित इन्द्रावती-६, बाँडेगाउँमा रहेको तोड्के जंगलमा छापा मारेको थियो। बेपत्तामध्ये सञ्चलालको हत्या भएको आशंका छ, तर प्रमाण फेला पार्न सकेन। करिब ८० रोपनी क्षेत्रमा फैलिएको आश्रमको एक स्थानमा कमलो माटो भेटिएपछि उत्खनन् गर्दा ९ वटा नुनको प्याकेट पनि भेटिएको थियो, जुन शव गलाउन प्रयोग गरेको हुनसक्ने अनुमान थियो।
थप अनुसन्धान जारी
बम्जन जोडिएको अरू मुद्दामा थप अनुसन्धान भइरहेको प्रहरीले जनाएको छ। यस घटनाले समाजमा ठूलो चर्चा पाएको छ र न्यायिक प्रक्रियामा थप तथ्यहरूको खुलासा हुने अपेक्षा गरिएको छ।
प्रतिक्रिया दिनुहोस् !