२९ जेठ,काठमाण्डाैं । विभिन्न देशमा पठाइदिन्छु भन्दै ठग्ने गिरोहका तीन जनालाई प्रहरीले पक्राउ गरेको छ।
कम्बोडिया, न्युजिल्याण्ड, फ्रान्स लगायत देशमा पठाइदिने भन्दै तीन सय जनाभन्दा बढीलाई ठगेको आरोपमा प्रहरीले तीन जनालाई पक्राउ गरेको हो।
पक्राउ परेका तीन जनालाई काठमाडौं उपत्यका अपराध अनुसन्धान कार्यालयको टोलीले मंगलबार पत्रकार सम्मेलन गरी सार्वजनिक गर्यो।
पक्राउ पर्नेमा चितवन भरतपुर घर भई काठमाडौंको टोखा बस्ने २८ वर्षीय राजकुमार भट्ट, कास्की पोखरा घर भई भरतपुर बस्ने २३ वर्षीय पवन पन्त र पोखरा बस्ने २२ वर्षीय नवीन विक छन्।
उनीहरूले ३०० जनाभन्दा बढीबाट करिब १५ करोड रकम ठगेको आरोप छ।
प्रहरीको अनुसन्धानबाट मुख्य अभियुक्त राजकुमार भट्ट देखिएका छन्। यसमा संलग्न थप व्यक्तिहरूको खोजी प्रहरीले गरिरहेको छ।
उनीहरूले विभिन्न नक्कली फेसबुक आइडी खोलेका थिए।
जस्तै: रविन आलेमगर, मनोजजंग थापा, महेश थापा लगायतको आइडी खोलेका थिए। ती आइडी प्रयोग गरी उनीहरूले विभिन्न देशमा वैदेशिक रोजगारीका लागि पठाउने भनेर विज्ञापन हाल्ने गरेको कार्यालयका प्रमुख एसएसपी सानुराम भट्टराईले बताए।
आकर्षक तलब, भत्ता हुने विज्ञापनले गर्दा धेरैले उनीहरूलाई सम्पर्क गर्ने गरेका थिए।
फेसबुकमार्फत् नै कुराकानी गर्ने, विश्वासमा पारेर त्यहीँबाट खातामा पैसा हाल्न लगाउने गरेको भेटियो,’ एसएसपी भट्टराईले भने, ‘पैसा डिपोजिट गरिएका खाता फेरि उनीहरूले कर्मचारी भनेर राखेको पायौं।’
कर्मचारी भनेर काममा राखेका व्यक्तिहरूलाई पनि झुक्याएर बैंक खाताको दुरूपयोग गरेको देखिएको अनुसन्धानमा संलग्न प्रहरीले बताए।
यद्यपि हाल ती व्यक्तिहरू आफै कारागारमा छन्।
त्यही फेसबुक मार्फत् कर्मचारीको माग गरेर केही व्यक्तिहरूलाई काम दिएको अनुसन्धानमा खुलेको छ।
सुनबहादुर बुढा, राजकुमार बस्नेत, प्रभाकर भट्टराई, हरिबहादुर कामी, शेरबहादुर तामाङ, राजेश श्रेष्ठ लगायतलाई भट्टले लेखापाल पदका लागि भनेर काम दिएका थिए।
कुनै कार्यालय नै नभए पनि उनीहरूले ती व्यक्तिलाई काम दिने भनेका थिए। मासिक ३० देखि ४० हजार रुपैयाँसम्म तलब दिने आश्वासन दिइएको थियो।
उनीहरूलाई तलब दिएर लेखापालको कामभन्दा पनि बैंक खाता दुरूपयोग गर्नका लागि प्रयोग गरिएको अनुसन्धानबाट खुलेको छ।
वैदेशिक रोजगार विभागले केही महिना अघि उनीहरूलाई पक्राउ गरेको थियो। हाल वैदेशिक रोजगार विभागको न्यायाधीकरणको फैसला बमोजिम धरौटी माग गरेको थियो। तर उनीहरूले धरौटी बुझाउन नसकेपछि कारागारमै छन्।
भट्टले सुनबहादुर लगायतलाई कर्मचारी भनेर राखेका थिए। उनीहरूको बैंकमा रकम जम्मा गर्न लगाउने र त्यही रकम झिकेर भट्टलाई नगद वा चेकमार्फत् निकालेर दिने गरेको अनुसन्धानबाट देखिन्छ,’ एक प्रहरीले भने, ‘तर उनीहरूको संलग्नता ठगी धन्दामा खुल्दैन। उनीहरूको बैंक खातामा जम्मा भए पनि त्यसको दुरूपयोग भट्टको समूहले गरेको देखिन्छ।’
विभागले उनीहरूको खातामा रकम जम्मा भएको देखेर अभियुक्त बनाए पनि प्रहरी कार्यालयमा भने उनीहरू पीडितको रूपमा देखिएका छन्।
उनीहरूले आफूहरू पीडित भएको भन्दै जेठ १६ गते कार्यालयमा जाहेरी दिएका छन्।
एउटा निकायले उनीहरूलाई अभियुक्त भने पनि हाम्रो नजरमा उनीहरू पीडित हुन्। उनीहरूको बैंक खाता दुरूपयोग भएको देखिन्छ। उनीहरू आफैँ ठगी धन्दामा संलग्न भएको देखिँदैन,’ अनुसन्धानमा संलग्न ती प्रहरीले भने, ‘फितलो अनुसन्धानले गर्दा उनीहरू फसेको देखिन्छ।’
यता वास्तविक पीडितहरूबाट पनि प्रति व्यक्ति ५ देखि १० लाख सम्म ठगी गरेको प्रहरीको अनुसन्धानबाट देखिन्छ। उनीहरूले नक्कली भिसा, वर्क पर्मिट, होटल बुकिङ, प्रहरी रिपोर्ट लगायतका कागजातहरू अनलाइनबाट पठाउने र टिकट र डलर साट्न भनेर थप रकम मागेर ठगेको खुलेको छ।
भट्टको गिरोहले करिब तीन–चार वर्षदेखि यस्तो धन्दा चलाउँदै आएका छन्। आफू बच्नका लागि भट्टले अरूको खाता दुरूपयोग गर्ने गरेका हुन्।
प्रतिक्रिया दिनुहोस् !