२४ चैत,सुनसरी । सुनसरीका पाँच स्थानीय तहमा जिल्ला प्रशासनले शुक्रबारबाट लगाएको कर्फ्यू आज पनि जारी छ। घटनाले निम्त्याएको तनावको समाधान खोज्न केहीबेरमा सुनसरीमा सर्वदलीय बैठक बस्ने भएको छ।
हरिनगरमा दुई समूहबीच भएको झडपले अवस्था तनावग्रस्त बनेपछि प्रशासनले कर्फ्यू आदेश जारी गरेको थियो।
सुनसरी प्रहरी प्रमुख एसपी विपिन रेग्मीले दिएको जानकारी अनुसार कर्फ्यू शनिबार पनि निरन्तर छ। ‘कर्फ्यूपछि अवस्था नियन्त्रणमा छ,’ उनले भने।
शुक्रबार साझदेखि कर्फ्यू लागेका ठाउँमा पनि प्रदर्शन भएको थियो।
सोही क्षेत्रका प्रदेशका सासद इस्राइल मन्सुरीका अनुसार अहिले सुनसरीका पाँच वटै पालिका शान्त छन्।
अहिले सबैतिर शान्त अवस्था छ’ उनले भने, ‘आज १० बजे जिल्ला प्रशासनमा सर्वदलीय बैठक छ। घटनाको छानबिन गर्ने र दोषीलाई जो भए पनि कार्बाहीको दायरामा ल्याउने काम हुनेछ।’
शुक्रबार बिहानैबाट सुरु भएको हरिनगर तनावले निम्त्याएको झडपमा १० जना प्रदर्शनकारी र १९ जना प्रहरी घाइते भएका थिए।
जिल्ला प्रशासन कार्यालय सुनसरीले हरिनगर गाउँपालिका, देवानगञ्ज गाउँपालिका, इनरुवा नगरपालिका, भोक्राहा नरसिंह गाउँपालिका र कोशी गाउँपालिकामा कर्फ्यू आदेश जारी गरेको थियो।
हरिनगर ४ स्थित भुटाहामा दुई समूहबीच झडप भएपछि शुक्रबार हरिनगरको केन्द्र तनावपूर्ण बनेको थियो। घटनास्थलमा प्रहरीले ८० राउन्ड हवाई फायर र ४० सेल अश्रु ग्यास प्रहार गरेको थियो।
प्रतिक्रिया दिनुहोस् !