२४ माघ,बारा — राष्ट्रिय अनुसन्धान विभागका पूर्वअनुसन्धान अधिकृत ( ईन्सपेक्टर ) विष्णु थापाको सवारी दुर्घटनामा परी मृत्यु भएको छ ।
बाराको मानमत-मटिअर्वा सडक खण्डको कलैया उपमहानगरपालिका-१६ उत्तरझिटकैया गाउँमा बुधबार साँझ सवारी दुर्घटना हुँदा घाइते भएका ६० वर्षीय थापाको कलैयाको राजलक्ष्मी अस्पतालमा उपचारको क्रममा मृत्यु भएको जिल्ला प्रहरी कार्यालय बाराले जनाएकाे छ । थापाले चलाएका ना३०प ९८३० मोटरसाइकल ना८ख २१९५ नम्बरको टिपरसँग ठोकिएको हो ।
पूर्व-पश्चिम महेन्द्र राजमार्गको छेउमा जितपुरसिमरा उपमहानगरपालिका-१६ मा पर्ने पिलुवा गाउँबाट कलैयातर्फ आउँदै गरेका थापा सवार मोटरसाइकल र कलैयाबाट पिलुवातर्फ जाँदै गरेको टिपर एकआपसमा ठोक्किएको थियो ।
टिपर चालक फरार छन् भने टिपर प्रहरीको नियन्त्रणमा छ । घटनाबारे थप अनुसन्धान भइरहेको बारा प्रहरिले जनाएकाे छ । थापाको शव कलैया प्रादेशिक अस्पतालमा पोस्टमार्टमका लागि राखिएको छ ।
पुर्ख्यौली काभ्रे घर भएका थापा पछिल्लो समय कलैया-५ घुसुकपुरमा परिवारसहित बस्दै आएका थिए । जागिरको सिलसिलामा उनी लामो समय बारामै बसेका थिए ।
प्रतिक्रिया दिनुहोस् !