२४ कार्तिक झापा । अभिनेत्री मनिषा कोइरालाले आगामी मंसिर ४ गते हुने प्रतिनिधि सभा तथा प्रदेश सभा निर्वाचनमा राष्ट्रिय प्रजातन्त्र पार्टी (राप्रपा) को पक्षमा उभिने बताएकी छन् ।
युवा, गतिशील र दूरदर्शी नेता राजेन्द्र लिङ्देन पाएको राष्ट्रिय प्रजातन्त्र पार्टीको पक्षमा चुनावी अभियानमा सहभागी हुन आफ्नो व्यस्त तालिकाबाट केही समय निकालेर घर फर्कदै छु,’ मनिषाले आज सामाजिक सञ्जाल ट्वीटरमा लेखेकी छन् ।
राष्ट्रवाद, देशको ऐतिहासिक र सांस्कृतिक विरासतबारे उनको बुझाइले उनी देशका अन्य समकालीन राजनीतिज्ञभन्दा माथि रहेको उनको दाबी छ । ‘म राजनीतिमा र मेरो राष्ट्रिय कर्तव्यप्रति वीपीबाट प्रेरित छु । देशलाई संरक्षकको रूपमा राजतन्त्र र लोकतान्त्रिक ढाँचामा जनताको सामाजिक आर्थिक उत्थानको ख्याल गर्ने जीवन्त राष्ट्रवादी पार्टीहरू चाहिन्छ,’ मनिषाले भनेकी छन् ।
मनिषा नेपाली काँग्रेसका संस्थापक एवम् भूतपूर्व सभापति तथा पूर्वप्रधानमन्त्री विश्वेश्वरप्रसाद कोइराला एवम् उनका भाइ तथा भूतपूर्व प्रधानमन्त्रीहरु मातृकाप्रसाद कोइराला र गिरिजाप्रसाद कोइरालाकी नातिनी हुन् ।
प्रतिक्रिया दिनुहोस् !