३० असार काठमाण्डौ । फुटको संघारमा पुगेको सत्तारुढ जनता समाजवादी पार्टी (जसपा) का दुबै खेमाले बहुमत जुटाएको दावी गरेका छन् । अलग-अलग केन्द्रीय समितिको बैठक राखेर औपचारिक विभाजनको अभ्यासमा रहेका दुबैतिरका नेताहरुले बहुमत सदस्य आफूतिर रहेको भन्दै पार्टीको वैधानिकता दावी गरेका हुन् ।
तर,यसअघि संस्थापनइतर खेमामा रहेको भनिएका वरिष्ठ नेता अशोक राईसहितका नेताहरु अन्तिम समयमा अध्यक्ष उपेन्द्र यादवतिर लागेपछि त्यता बहुमत पुगेको उनीहरुको दावी छ । संघीय परिषद अध्यक्ष डा. बाबुराम भट्टराई समूहले पनि आफ्नो पक्षमा बहुमत जुटेको बताइरहेको छ ।
भट्टराई पक्षधर मानिने राजकिशोर यादव,रामनरेश राय यादव र अमृता अग्रहरीलगायतका नेताहरू दुवैतिरको बैठकमा सहभागी भएका छैनन् । दुवै समूहमा नखुलेका तर निर्णायक मानिएका नेताहरूलाई आफ्नो समूहमा पार्न तानातान गरिरहेका छन् । पार्टी फुट्ने निश्चित भएपछि आधिकारिकताको प्रश्न प्रमुख हुने भएकाले तटस्थ बसेका नेताहरूलाई दुवै पक्षले आफ्नो समूहमा तान्न र आफ्नो प्रभाव बलियो देखाउन प्रयास गरेका हुन् ।
जसपामा आन्तरिक विवाद चर्किंदै जाँदा अघिल्लो साता अध्यक्ष उपेन्द्र र बाबुरामबीच सहमतिमै अलग हुने समझदारी जुटेको चर्चा थियो । त्यसलगत्तै संस्थापनले वीरगन्जमा बस्ने गरी केन्द्रीय समितिको बैठक बोलाएपछि बाबुरामले त्यसको काउन्टरमा समानान्तर बैठक बोलाएका थिए ।
उपेन्द्र पक्षको बैठक वीरगन्जमा बसिरहेको छ भने बाबुराम समूह काठमाडौँमा जुटेको छ । यहि बैठकबाट अधिकांश नेताले आफ्नो कित्ता क्लियर गरेपनि केही नेता भने दुबैतिर नगएका हुन् । अल्पमतमा रहेको बाबुराम समूह अहिले तिनै नेताहरु चोर्ने रणनीतिमा छ ।
प्रतिक्रिया दिनुहोस् !