२९ असार काठमाडौं । ललितपुरको गोदावरी नगरपालिका ठेचोमा रहेको लिटिल स्टार ईङलिश स्कुलका प्रिन्सिपल चक्र महर्जनले विद्यार्थीलाई मरणासन्न हुने गरी कुटेका छन् ।
कक्षामा ५ मा अध्ययनरत एक विद्यार्थीलाई उनले निर्घात कुटपिट गरेका हुन् । प्रिन्सिपल महर्जनले फलामको स्केलले मर्नेगरी कुट्दा ती बालकको शरीरभरि चोटपटक लागेको छ ।
दुई साताअघि स्कुलमा साथीसंग चल्दा बालक मुखबाट ‘चुडेलनी’ भन्ने शब्द फुत्कियो । साथीले शिक्षिकालाई गएर कुरा लगाइदिएपछि प्रिन्सिपलले रामधुलाई हुने गरी पिटे ।
फलामको स्केलले कुट्दा बालकको पेटमा चोट लागेको छ । शरीरको अगाडि र पछाडि भागमा स्केलको डाम बसेको छ । स्केलको धारले काटिएको घाउ पनि देखिन्छ । पाटन अस्पतालमा गरेको मेडिकल जाँचले उनको घाउ अत्यन्तै गम्भीर भएको पुष्टि गरिसकेको छ ।
पीडित पक्ष न्यायका निम्ति लगातार तीन दिन प्रहरी चौकी गएपनि कारबाही अघि बढाइएन । उल्टै प्रहरीले थर्काएर पठाएको बालककी फुपु शोभा खड्काले बताइन् ।
पहिले चापागाँउ प्रहरी चौकी पुगेका पीडित परिवारको जाहेरी लिन प्रहरीले मानेन् । जाहेरी लेखिदिनुभन्दा प्रहरीले भलिभाती भनेर थर्काउदै फिर्ता पठाएको उनको भनाइ छ ।
त्यसपछि पीडित परिवार महानगरीय प्रहरी परिसर, जावलाखेल पुगेका थिए । त्यहापनि पीडकलाई संरक्षण दिन खोजेपछि पीडित पक्षले मिडिया बोलाउने चेतावनी दिएका हुन् ।
११ वर्षीय बालकको कमलो शरीरमा निर्घात कुटपिट गरेका प्रिन्सिपलले भने यो घटनालाई ढाकछोप गर्न मेलमिलाप गरेको खुलेको छ ।
नेपाली कांग्रेसका नेतासमेत रहेकाले उनलाई बचाउ गर्न खोजिएको हो । उनको मुद्दा मिलाउन चापागाँउ प्रहरी चौकीमा कांग्रेसका अन्य नेता र कार्यकर्तासमेत पुगेका थिए ।
प्रिन्सिपल महर्जनले बालकलाई १० कक्षासम्म निःशुल्क पढाइदिने भन्दै मिलापत्र कागजातमा हस्ताक्षर गरेको पाइएको छ ।
पीडित पक्षले कारबाही हुनुपर्ने माग गरेपनि दबाबमा कारण मिलापत्र गर्न बाध्य भएका हुन् । ‘हामीले मिलापत्र नगर्नेभन्दा पनि दबाब दिएर कागजातमा हस्ताक्षर गर्न लगाइयो’, फुपु शोभाले भनिन् ।
भन्छिन्,‘नेपालमा न्याय पाउन गाह्रो रहेछ । मिलापत्र गरेर यो मुद्दा टुंगाइसकेको छ ।’
विद्यार्थीलाई नकारात्मक व्यवहार गर्नु र चोट लाग्ने गरि पिट्नु बाल अधिकारको हनन र कुटपिटको समेत फौजदारी मुद्दा हो । फौजदारी मुद्दामा मेलमिलाप गर्न मिल्दैन् । फौजदारी अपराध मेलमिलाप गर्ने र गराउनेसमेत अपराधको मतियार हुन सक्छन् ।
यता, प्रिन्सिपल महर्जनसंग यसबारे बुझ्न खोज्दा उनले फोन उठाएनन् ।जनआस्था
प्रतिक्रिया दिनुहोस् !