२७ असार काठमाडौं । नेपाल प्रहरीले केही जिल्लाका एसपीहरुको सरुवा तयारी गरेको छ । डीआइजी र एसएसपी बढुवामा बालुवाटारको दबाबमा अशोक सिंह र ओम रानाजस्ता कारबाहीका लागि सिफारिस भएकाहरु समेत परेपछि बिरोधको स्वर गुन्जिरहेको छ । एसपी सरुवामा समेत विवादित र पटक पटक इचार्ज पाएकाहरुलाई आकर्षक जिल्लामा सरुवा गर्न बालुवाटारले दबाब दिंदा आइजीपी धिरजप्रताप सिंह सकसमा परेका छन् ।
बारा, रौतहट, मकवानपुर, कपिलवस्तु जस्ता महत्वपूर्ण जिल्लाका एसपी एसएसपी बढुवा भएकाले ती जिल्लाका प्रहरी प्रमुख रिक्त भएका छन् । बागमती ट्राफिकका एसपी पनि एसएसपी बढुवा भएकाले रिक्त छ । सुनसरी, कास्की र बाँकेका एसपीको एक बर्ष पुगिसकेको छ । कास्कीका एसपी रमेश थापा त अमेरिका तालिममा गइसकेका छन् । यी जिल्लामा सरुवा हुनका लागि एसपीहरुले शक्तिकेन्द्रमा चर्को दौडधूप सुरु गरेका छन् ।
एसपी सरुवाका लागि सबैभन्दा चर्को भिडन्त कास्कीका लागि देखिएको छ । कास्कीमा सरुवा हुनका लागि एसपी अजय केसी, गंगा पन्त, दिपशमशेर जबरादेखि होविन्द्र बोगटीसम्म लागेका छन् । यी एसपीहरु पाए कास्की नपाए बाँके र बाराका लागि लागेका छन् । सन्तोषसिंह राठौर बाँकेको एसपी हुन आरजु राणाका पीए प्रकाश देउवामार्फत् दबाब सृजना गरिरहेका छन् ।
अख्तियार दुरुपयोग अनुसन्धान आयोगमा कार्यरत अजय केसीले एक आयुक्तकै नाम लिएर कास्कीमा सरुवा पक्का भइसकेको भन्दैआएका छन् । विश्व पोखरेललाई आइजीपी नियुक्त गर्न खुलेआम लागेकाले पनि आइजीपी धिरजप्रताप सिंह केसीलाई कास्कीमा पठाउने पक्षमा छैनन् । उनी दीपशमशेर जबरालाई कास्कीको एसपीमा पठाउने पक्षमा छन् । तर केसी चौतर्फी दबाब सृजना गरी कास्कीमा सरुवा हुने दाउमा छन् । पोखरामा अपराध र गुण्डागर्दीमा बदनाम एलजी समूहले समेत केसीलाई सरुवा गराउन कांग्रेस नेताहरुलाई परिचालन गरेको स्रोतले बताएको छ । एलजी समूहले केसीलाई लगेर पोखरामा आफ्नो गुण्डागर्दी र असुली धन्दा निर्वाध चलाउन चाहिरहेको छ । केसीले पोखराका कांग्रेसका नेताहरु समेत आफ्नो पक्षमा परिचालन गरी सरुवाको माहौल बनाएका छन् ।
यसअघि एमाले नेता महेश बस्नेतका निकट उनी अहिले कांग्रेस उपसभापति पूर्णबहादुर खड्काको नाता पर्ने भन्ने गर्दछन् । केपी ओलीको सरकार गठन हुनासाथ महेश बस्नेतले नै उनलाई नवलपरासीमा सरुवा गरेका थिए । महेशपुर लगायतका परासीका नाकाबाट सुपारी र केराउ भारत तस्करी गर्ने बस्नेतको सेटिङ चलाउन उनलाई सरुवा गरिएको थियो । उनले ती नाकाबाट केराउ र सुपारी तस्करी गरेको बिषय भारतीय संचारमाध्यमले समेत भिडियोसहित त्यतिबेला सार्वजनिक गरेका थिए ।
सन्तोषसिंह राठौर बााँकेमा जानका लागि बालुवाटार धाइरहेका छन् । सर्लाहीमा एसपी हुँदा सीडीओ बाबुराम खतिवडा र सशस्त्रका एसपी गंगाराम श्रेष्ठसँगै बसेर जुवा खेलेको भिडियो सार्वजनिक भएपछि राठौर कारबाहीस्वरुप सरुवा भएका थिए ।
सुनसरीमा सरुवा हुनका लागि गृहमन्त्रालयका प्रभु ढकाल लागेका छन् । मकवानपुरमा सरुवाका लागि वीरबहादुर ओलीले चाहना राखेका छन् । उनी हाल हेटौंडा गणमा कार्यरत छन् । कपिलवस्तुमा सरुवा हुनका लागि दंगागण सुनवलका रामेश्वर कार्की लागेका छन् । धनुषामा डीएसपी हुँदा उनी घुसकाण्डमा तानिएका थिए । रौतहटको एसपीका लागि प्रकाश रानाभाट नेकपा समाजवादीका नेतादेखि धनुषाका कांग्रेस नेता महेन्द्र यादवको मन जित्न खोजिरहेका छन् । उनी विभिन्न काण्डमा परेपछि धन्ुषाको एसपी हुँदा तानिएका थिए । त्यसो त उनी बागमती प्रदेश ट्राफिकको प्रमुख हुँदा पनि विवादमा तानिएका थिए । नेपालफेस
प्रतिक्रिया दिनुहोस् !