१८ मंसिर,काठमाडौं। मार्गशीर्ष शुक्ल पूर्णिमाका दिन आज पितृको मान र प्रकृतिको सम्मानका रूपमा किराँत समुदायले उधौली पर्व धुमधामसँग मनाउँदैछन्।
किराँत समुदायका याक्खाले चासुवा, सुनुवारले फोलस्यादर, राईले उधौली सकेला र लिम्बूहरूले चासोक तङ्नाम पर्वका नाममा यसलाई मनाउँछन्।
लिम्बूहरूले चासोक तङ्नाम पर्व तीन दिनअघि नै मनाउन सुरु गरेका थिए, तर आज संयुक्त रूपमा यस समुदायका सबैले उधौली सकेला अर्थात् उधौली पर्व मनाउँछन्।
किराँत समुदायले आफूले लगाएको अन्नबाली पाकेपछि इष्टदेवतालाई चढाउने, खानका लागि अनुमति माग्ने तथा पितृलाई स्मरण गर्ने दिनलाई पर्वका रूपमा मनाउँछन्, भने बाली लगाउने बेलामा यावा अर्थात् उभौली पर्व मनाइने प्रचलन छ।
उभौलीमा खेतीपाती राम्रो होस् भनी पूजा गर्ने र उधौलीमा खेतीपाती राम्रो गरेकामा साकेला (भूमे) लाई धन्यवाद दिने विश्वाससमेत किराँत जातिमा छ। खस आर्यले मनाउने धान्य पूर्णिमा, नेवार समुदायले मनाउने यःमरि पुन्हि अर्थात् योमरी पूर्णिमा र किराँत समुदायले मनाउने उधौली पर्वको भाव भने एकै छ ।
जसअनुसार नयाँ अन्न बाली भित्र्याएपछि आ–आफूले मानेका देवी देवतालाई चढाएर खाने परम्परा रहेको छ। यस पर्वका अवसरमा सरकारले विगतमा काटिएको बिदालाई पुनः दिन थालेको छ र यस अवसरमा आज देशभर सार्वजनिक बिदा दिइएको छ।
प्रतिक्रिया दिनुहोस् !