१६ मंसिर,बारा । पर्सामा १०४ केजी गाँजा र बी ए बी २३९८ नम्बरको कारसहित नियन्त्रणमा लिइएका मकवानपुरका कुमार स्याङ्ताङ र भीम स्याङ्ताङलाई छुटाउन प्रहरी चौकीमै पुगेर हुलहुज्जत गर्न खोज्ने व्यक्तिहरू प्रहरीको थप टोली पुगेपछि भागेका छन्।
मनहरीबाट गाँजा लोड गरेर बाराको जीतपुर हुँदै पटेर्वा सुगौलीको सोनवर्षातर्फ जाँदै गरेको अवस्थामा सोमबार दिउँसो करिब ३ बजे प्रहरी सहायक निरीक्षक रामनिवास समुहको टोलीले पटेर्वा सुगौली गाउँपालिका-२ रंगपुरटाँडीबाट उनीहरूलाई समातेको थियो।
नियन्त्रणमा लिइएका दुई जना र गाँजासहितको कारलाई प्रहरी चौकी रंगपुरटाँडीमा राखिएका बेला मंगलबार अपरान्ह गाँजाका २ कारोबारी र उनीहरूका ३ जना बिचाैलीयाहरूले केही मान्छेहरूको भिड लिएर चौकीमा पुगी होहल्ला गर्न खोजेका थिए।
प्रहरी सहायक निरीक्षक साहको आग्रहमा इलाका प्रहरी कार्यालय पेटेर्वा सुगौलीबाट प्रहरी निरीक्षक प्रकाश थापाको नेतृत्वमा १५ जनाको थप टोली चौकीमा पुगेपछि कारोबारी र दलालहरू त्यहाँबाट फरार भएका थिए।
प्रहरीले नियन्त्रणमा लिइएको गाँजा, कार र दुई जना व्यक्तिलाई सोमबारै साँझ जिल्ला प्रहरी कार्यालय पर्सामा पठाएको छ।
गाँजासहित पक्राउ परेकाहरूले काराेबारमा संलग्नहरूको नाम बताएपछि कारोबारी र बिचाैलियाहरू उन्मुक्ति पाउन मंगलबार बिहानैदेखि जिल्ला प्रहरी कार्यालयमा धाउन थालेको प्रहरी स्रोतले जनाएको छ।
यता प्रहरीले भने हुलहुज्जत गर्न खोज्ने कारोबारी र दलालहरूको खोजी गरिरहेको जनाएको छ। छिमेकी मुलुक भारतको बिहारमा विधान सभाको निर्वाचनका बेला रोकिएको लागूऔषध (गाँजा, चरेस र अफिम) को तस्करी चुनाव सकिएलगत्तै फेरि सुरु भएको छ ।
जहाँ मकवानपुर र धादिङका पहाडी भेगमा उत्पादित लागूऔषधलाई पर्साको ग्रामीण भेगमा भण्डारण गरी त्यहाँका नाका हुँदै भारतमा तस्करी हुने गरेको छ।
प्रतिक्रिया दिनुहोस् !