३ मंसिर,काठमाण्डाैं । नेकपा एमालेका अध्यक्ष केपी शर्मा ओलीले ललितपुरमा आयोजित कार्यक्रममा सम्बोधन गर्दै बारा घटनामा सरकारले चरम लापरबाही गरेको बताएका छन्।
उनले नेताहरूलाई सभा र कार्यक्रममा जान रोक लगाए सरकारले कसरी चुनाव गराउने भनेर प्रश्नसमेत गरे र ‘सरकारले एकातिर चुनाव गराउने भनेर आज छलफलमा बोलाएको छ, उता बारामा ‘जेनजी’का नाममा केही विद्वानहरूले ढुंगामुढा र तोडफोड गरेर एयरपोर्ट बन्द गराए, हाम्रो सभालाई बिथोलिदिए, कस्तो चुनाव गराउन खोज्दैहुनुहुन्छ?’ भनी प्रधानमन्त्रीलाई सोधे।
ओलीले गत भदौ २३ र २४ गते वीरगन्ज र बारा जलाउने अपराधीहरूले नै यो घटना गराएको दाबी गर्दै ५०-६० जना आएर एयरपोर्ट नै बन्द गराइदिने, यो देश कस्तो भयो भनेर प्रश्न गरे। उनले ‘जतिखेर चाह्यो, सभा गर्न बन्द, अनि भन्छ चुनाव गर्ने, सभा गर्न नदिनेले चुनाव कसरी गर्छ?’ भन्दै अपराधीहरूलाई नियन्त्रण गर्न भनिरहेको तर सरकारले अटेरी गरिरहेको बताए।
अध्यक्ष ओलीले अस्ति वीरगन्ज जलाउने, बारा जलाउने तिनै अपराधीहरू भेला भएका छन्, किनकि तिनीहरूलाई कारबाही भएको छैन र उनीहरूको मनोबल उच्च छ भन्दै तिनीहरू नै भेला भएर एमालेमाथि आक्रमण गरिरहेको स्पष्ट पारे। उनले दुर्गा प्रसाईंको पक्राउप्रति पनि आपत्ति जनाए र भिडियो बनाउँदैमा रातारात पक्राउ गरेकोप्रति आपत्ति व्यक्त गरे।
ओलीले ‘दुर्गा प्रसाईंलाई दिने जवाफ सरकारसँग छ कि छैन? यतिकै पुलिस पठाएर समातेर हुन्छ? गिरफ्तार गरेर मुख बन्द गराए समस्याको समाधान हुन्छ? बिहान समाते पनि हुन्थयो नि? राति राति समात्ने? तमासा गरेर हुन्छ?’ भन्दै सरकारलाई प्रश्न गरे।
प्रतिक्रिया दिनुहोस् !