३ मंसिर,बारा । बारा जिल्ला र रौतहटको सिमानामा पर्ने अरुवा खोला नाका अवैध तस्करीको केन्द्र बन्न पुगेको छ । जहाँ भारतीय कुख्यात तस्करहरूले सुरक्षाकर्मीको मिलोमतोमा निर्बाध रूपमा भारतीय माछाको व्यापक तस्करी गरिरहेका छन् ।
विशेषगरी, कुख्यात तस्कर श्यामसुन्दर कुश्वाहाले राति २ पिकअप आन्ध्रप्रदेशबाट ल्याइएका मरेका माछाहरू जङ्गे पिलर ३५६ नजिकैबाट मोटरसाइकलको प्रयोग गरी नेपाल भित्राएको स्थानीयले बताएका छन्, जसले सुरक्षा प्रशासनको भूमिकामाथि गम्भीर प्रश्न उठाएको छ।
यी माछाहरूलाई आर्थिक कारणले गर्दा र लामो दुरीको ढुवानी (आन्ध्रप्रदेशबाट फ्रिजर गाडीमा ल्याउँदा १० देखि १२ दिन लाग्ने) का कारण मरेको लासलाई सड्नबाट बचाउन र ताजा देखाउन फर्माेलिन नामक रसायनको प्रयोग गरिएको हुन्छ।
फर्मालिन एक विषाक्त रसायन हो, जुन मुख्यतया शवहरूलाई सुरक्षित राख्न प्रयोग गरिने भए पनि यसको प्रयोगले माछालाई लामो समयसम्म ताजा देखाउँछ, तर मानव स्वास्थ्यका लागि यो अत्यन्तै हानिकारक छ।
फर्मालिनयुक्त माछाको उपभोगले दीर्घकालिन रूपमा क्यान्सर, मिर्गौला र कलेजोमा क्षति पुर्याउने, पाचन प्रणालीमा गडबडी ल्याउने र तत्कालै श्वासप्रश्वासमा समस्याजस्ता गम्भीर स्वास्थ्य समस्याहरू निम्त्याउन सक्छ।
भारतीय माछा नेपाली उत्पादनको तुलनामा सस्तो हुने भएकाले र तस्करहरूले पैसाको बलमा सीमा नाकाका सुरक्षाकर्मीलाई सजिलै प्रभावमा पारेर तस्करी गर्ने भएकाले यसले नेपालको अर्थतन्त्रमा नकारात्मक असर पारेको छ।
सोही तस्कर समूहले यसरी भित्र्याइएको हानिकारक माछालाई नेपालको राजधानी काठमाडौँ लगायत ठूला शहरहरू सम्म पुर्याउने गरेको छ। यसरी अवैध रूपमा सस्तो र हानिकारक माछाको आयात बढ्दा नेपाली माछा व्यवसायीहरू संकटमा परेका छन्।
जबकि नेपालमै उत्पादित माछाले देशको माग धान्न सक्ने क्षमता राख्दछ। तस्करीको यो सञ्जालबाट माछा मात्र नभई कपडा, सुर्तीजन्य पदार्थ, हार्ड वेयर र किराना सामग्री समेत मौलापुर, कटहरिया, विजयपुर, हरनहिया, सिम्रौनगढ, कोल्भी, बरियारपुर लगायतका बजारहरूमा दर्जनौं मोटरसाइकल प्रयोग गरी राति र बिहान बिना रोकटोक पुर्याउने गरिएको स्थानीयको भनाई छ, जसलाई तत्काल नियन्त्रण गर्नुपर्ने देखिन्छ।
प्रतिक्रिया दिनुहोस् !