३० कार्तिक,बारा । अख्तियार दुरुपयोग अनुसन्धान आयोग, टङ्गाल, काठमाडौंले आज एक प्रेस विज्ञप्ति जारी गर्दै खानेपानी तथा सरसफाई डिभिजन कार्यालय, डिभिजन नं. ४ कलैया, बाराका तत्कालीन निमित्त डिभिजन प्रमुख किशोरी प्रसाद यादव र लेखापाल प्रदिप दास लाई बोलपत्रको सूचना राष्ट्रियस्तरको दैनिक पत्रिकामा सार्वजनिक नगरी मिलेमतोमा ठेक्का लगाई अनियमितता गरेको आरोपमा विशेष अदालत, काठमाडौंमा आरोपपत्र दायर गरेको जानकारी दिएको छ।
अनुसन्धानका क्रममा आ.व. २०७९/०८० को स्वीकृत बजेट अनुसार बारा जिल्ला अन्तर्गत विभिन्न निर्माण कार्यको लागि २३ वटा बोलपत्र आह्वानको सूचना सार्वजनिक खरिद ऐन, २०६३ को दफा १४ को उपदफा (१) बमोजिम प्रकाशन गर्नुपर्नेमा सो नगरी, निमित्त डिभिजन प्रमुख यादव र लेखापाल दासले सान्दर्भिक मिडिया नेटवर्क प्रा.लि.का प्रबन्धक निसान्त सिग्देल र प्रभाव दैनिकका बजार प्रबन्धक सन्तोषराज खरेल सँगको आपसी मिलोमतोमा उक्त बोलपत्र आह्वानको सूचना लुकाई छिपाई, सार्वजनिक रूपमा प्रकाशन नगरी, ठेक्काको प्रयोजनार्थ अभिलेखमा राख्ने गरी प्रभाव दैनिक पत्रिकाको एक प्रति मात्र प्रकाशित गराई झुट्टा बिल भरपाई लगायतका कागजातको आधारमा सान्दर्भिक मिडिया नेटवर्क प्रा.लि. लाई रु.३,१६,५७०/- (तीन लाख सोह्र हजार पाँच सय सत्तरी रुपैयाँ) (अग्रीम कर बाहेक) भुक्तानी गरेको भेटिएको छ।
प्रेस काउन्सिल नेपाल तथा प्रभाव पब्लिकेसन प्रा.लि.को पत्रबाट २०७९ फागुन २१ गतेको प्रभाव दैनिकको सक्कल प्रतिमा उक्त बोलपत्रको सूचना प्रकाशित नभएको पुष्टि भएपछि, अख्तियारले यो कार्य भ्रष्टाचार निवारण ऐन, २०५९ को दफा ८ को उपदफा (१) को देहाय (ङ) बमोजिमको कसूर भएको ठहर गरेको छ।
मुख्य कसूरदार किशोरी प्रसाद यादव र प्रदिप दास तथा मतियार बनेका निसान्त सिग्देल र सन्तोषराज खरेललाई बिगो रु. ३,१६,५७०/- कायम गरी सोही ऐनको दफा ८ को उपदफा (१) र मतियारको हकमा दफा २२ बमोजिम कैद, जरिवाना र बिगो असूल उपर गर्न मागदाबी लिइएको विज्ञप्तिमा उल्लेख छ।
प्रतिक्रिया दिनुहोस् !