२४ कार्तिक, बारा । जितेन्द्र सोनलले विश्वासको मत नलिई राजीनामा दिएपछि, मधेस प्रदेश प्रमुख सुमित्रा सुवेदी (भण्डारी) ले नेपालको संविधानको धारा १६८ (३) बमोजिम प्रदेशसभामा सबैभन्दा ठूलो दल (एमाले) का नेता सरोज यादवलाई मुख्यमन्त्री नियुक्त गरेकी छन् ।
यद्यपि, प्रदेश प्रमुखले बिरामीको उपचार गराउने बहानामा सिन्धुलीको एक होटलमा गएराती गोप्य रूपमा शपथ ग्रहण गराएको भन्ने विपक्षी दलहरूको गम्भीर आरोपले यो नियुक्तिलाई लिएर ठूलो संवैधानिक र राजनीतिक विवाद सिर्जना गरेको छ ।
जसले गर्दा यो सरकारको वैधानिकता र नैतिक आधारमै प्रश्न उठ्न पुगेको छ। यो तीव्र गतिमा बनेको नयाँ मुख्यमन्त्रीलाई अगाडिको मुख्य चुनौती भनेको एक महिनाभित्र विश्वासको मत लिनु हो ।
साथै असन्तुष्ट पक्षलाई मिलाएर सत्ता समीकरणको जटिल व्यवस्थापन गर्नु हो; अन्यथा, विगतमा झैं अस्थिरता दोहोरिँदै मधेस प्रदेश फेरि पनि सत्ताको खिचातानी र राजनीतिक तमासा को चक्रव्यूहमा फस्ने निश्चितप्रायः छ, जसले प्रदेशको विकास र सुशासनलाई थप पछाडि धकेल्नेछ।
प्रतिक्रिया दिनुहोस् !