२२ कार्तिक,बारा । बाराको सुवर्ण गाउँपालिकाका अध्यक्ष राजेश प्रसाद यादव माथि नैतिकताको खडेरी र शक्तिको चरम दुरुपयोग गर्दै व्यापक आर्थिक तथा प्रशासनिक अनियमितता गरेको गम्भीर आरोप लागेको छ।
सार्वजनिक भएको एक सूचनाअनुसार, गाउँ कार्यपालिकाले एम.वि.वि.एस. वा वि.पि.एच. अध्ययनरत विद्यार्थीलाई प्रदान गर्ने रु. २ लाख नगद र १ थान ल्यापटपसहितको छात्रवृत्तिमा अध्यक्ष यादवले आफ्नै छोरा सन्दिप कुमार यादव लाई छनौट गराउनुले उहाँको पदिय शक्तिको दुरुपयोग स्पष्ट रूपमा देखिएको छ।
यस सम्बन्धमा प्रमाण सार्वजनिक हुँदा पनि अध्यक्ष यादवले राजीनामा नदिई पदमा बसिरहनुले सार्वजनिक पद धारण गर्ने व्यक्तिको नैतिक दायित्व माथि गम्भीर प्रश्नचिह्न खडा गरेको छ।
अध्यक्ष यादवमाथि लागेको अनियमितताको फेहरिस्त यही छात्रवृत्ति प्रकरणमा मात्र सीमित छैन। उहाँ यसअघि नै गरिब तथा निमुखा जनतालाई दिइने आर्थिक सहयोग, औषधि खरिद, मोबाइल खरिद, माछापोखरी ठेक्का प्रकरण, र कर्मचारी भर्नामा लाखौं कमिसन उठाएको आरोपमा तानिनुभएको छ।
अख्तियार दुरुपयोग अनुसन्धान आयोगले उहाँमाथि भ्रष्टाचारको आरोप मा छापा मारेको र उहाँका मोबाइल तथा सिमकार्ड नियन्त्रणमा लिएको समाचारसमेत सार्वजनिक भइसकेको छ।
त्यस्तै, गाउँपालिकामा सञ्चालित १८ वटा गैरसरकारी संस्थामार्फतको कार्यक्रममा करिब रु. १,१६,३८२ को कर छली र सार्वजनिक खरिद नियमावली २०६४ को नियम ९९ को ठाडो उल्लंघन गर्दै लागत अनुमान स्वीकृतिबिना नै भुक्तानी गरिएको पाइएको छ। ठूलो मात्रामा रकमको दुरुपयोग भएको भन्दै अख्तियारले कर्मचारी र उहाँका आफन्तहरूका खातामा ठूलो रकमको लेनदेनबारे पनि अनुसन्धान गरिरहेको छ।
यसैगरी, पालिका अध्यक्ष यादवले दशैँको बिदाका बेला पालिकाको बजेटबाट भारतका टिकटक स्टारहरूलाई बोलाई कार्यालयभित्रै रक्सी सेवन गरी अनैतिक क्रियाकलाप गरेको भन्दै आक्रोशित युवाहरूले पालिका घेराउ गर्दा प्रहरी बल प्रयोग गरेर उहाँलाई सुरक्षित निकाल्नुपरेको घटनाले उहाँको गैरजिम्मेवार आचरण र पदीय मर्यादाको अवमूल्यन देखाउँछ। यी सम्पूर्ण घटनाक्रमले गर्दा स्थानीय बासिन्दामा गहिरो आक्रोश र असन्तुष्टि बढेको छ।
यी सब अनियमितताका आरोप र प्रमाण छताछुल्ल हुँदा पनि अध्यक्ष यादव पदमा बसिरहनुले नेपालको सार्वजनिक जीवनमा नैतिकताको पतन र जवाफदेहीताको अभाव लाई दर्साउँछ। एकातर्फ उहाँ प्रमाण पेस भए राजीनामा दिने चुनौती दिने, तर प्रमाण सार्वजनिक भएपछि पनि पदमा कायम रहनुले उहाँको दोहोरो मापदण्ड र कुन नैतिकताका आधारमा शासन चलाउँदै हुनुहुन्छ भन्ने प्रश्न स्थानीय र सम्पूर्ण सरोकारवालाहरूले उठाएका छन्।
यस विषयमा अध्यक्ष राजेश प्रसाद यादवको प्रतिक्रियाका लागि सम्पर्क गर्न खोज्दा उहाँको मोबाइल स्विच अफ रहेको पाइएको छ, जसले गर्दा उहाँ आफ्नो जिम्मेवारीबाट पन्छिन खोजेको आशंका बढाएको छ।
प्रतिक्रिया दिनुहोस् !