१७ कार्तिक,काठमाण्डाैं । प्रधानमन्त्री सुशीला कार्कीले आज मन्त्री र सचिवहरूसँगको छलफलमा गत भाद्र २३ र २४ गतेको आन्दोलनको मर्मअनुरूप भ्रष्टाचार नियन्त्रण, सुशासन र प्रभावकारी सेवा प्रवाहमा नागरिकले प्रत्यक्ष अनुभूति गर्नेगरी सबै मन्त्रालयको ब्लूप्रिन्ट तयार पारेर तत्काल कार्यान्वयन गर्न कर्मचारीहरूलाई कडा निर्देशन दिएकी छिन् ।
उनले कर्मचारीहरूलाई देशको स्थायी सरकार भएको बताउँदै आफ्नो ज्ञान र सीपको प्रयोग गरी कर्तव्य र उत्तरदायित्व पालनमा खरो उत्रन र जनतालाई छुने सुधार योजनाहरू अघि सार्न आग्रह गरेकी छिन् ।
यसका अतिरिक्त, प्रधानमन्त्रीले सार्वजनिक खर्चमा मितव्ययिता कायम गर्न अर्थ मन्त्रालयको परिपत्र कडाइका साथ पालना गर्न, निजी क्षेत्रको मनोबल वृद्धि गर्न, अनावश्यक संरचनाहरू खारेज, गाभ्ने वा हस्तान्तरण गरी प्रशासनलाई चुस्त बनाउन, कर्मचारीको सरुवा-बढुवा प्रणालीलाई न्यायोचित, पारदर्शी र अनुमानयोग्य बनाउन, तथा निर्वाचनको पूर्व तयारीका कार्यहरूलाई चुस्त दुरुस्त रूपमा सम्पादन गर्न समेत निर्देशन दिएकी छिन् ।
प्रतिक्रिया दिनुहोस् !