१६ कार्तिक,जनकपुरघाम । धनुषामा पूर्वपश्चिम राजमार्गअन्तर्गत गणेशमान चारनाथ नगरपालिका-१, वीरेन्द्र बजारमा शनिबार साँझ विराटनगरबाट धनगढी गइरहेको सुप्र ०१–००१ख ३२८८ नम्बरको बसले विपरीत दिशाबाट आइरहेको प्रदेश २–०१–००१ह १२३० नम्बरको अटोरिक्सालाई ठक्कर दिँदा एकै परिवारका तीन सदस्यसहित चार जनाको घटनास्थलमै मृत्यु भएको छ भने दुई बालबालिका गम्भीर घाइते भएका छन्।
इलाका प्रहरी कार्यालय ढल्केबरका प्रहरी निरीक्षक लक्ष्मण केसीका अनुसार, मृत्यु हुनेहरूमा गणेशमान चारनाथ नगरपालिका, भरतपुरका ४० वर्षीय धनबहादुर पुर्वछाने मगर, ३५ वर्षीय शम्भु पुर्वछाने मगर, ३५ वर्षीया निशा मगर र करिब ४० वर्षीय अटो चालक डम्बर राई रहेका छन्।
दुर्घटनामा गम्भीर घाइते भएका १४ वर्षीय शीतल मगर र नौ वर्षीय रोशन मगरलाई उपचारका लागि जनकपुरधामस्थित न्यूरो अस्पतालमा भर्ना गरिएको छ र प्रहरीले घटनाबारे थप अनुसन्धान गरिरहेको जनाएको छ।
प्रतिक्रिया दिनुहोस् !