७ कार्तिक,रूकुम । रुकुम पश्चिमको बाँफीकोट गाउँपालिका–७ लिस्नेस्थित भित्री सडकखण्डमा आज साँझ जिल्ला सदरमुकाम खलङ्गाबाट आठबिसकोट नगरपालिका–२ स्यालाखदी जाँदै गरेको रा१ज ४२२ नम्बरको जिप दुर्घटना हुँदा सात जनाको घटनास्थलमै मृत्यु भएको छ भने अन्य १० जना घाइते भएका छन् ।
जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक हरिप्रसाद पुनका अनुसार जिप सडकदेखि करिब ७०० मिटर तल खसेको हो ।
मृत्यु हुनेमा आठबिसकोट नगरपालिका–२ स्यालाका ३० वर्षीया कमला वली, १६ वर्षीय टेकजङ्ग बुढा, १५ वर्षीया दिलमाया बूढा, १७ वर्षीया मनिका वली, १८ वर्षीया शर्मिला विक, २२ वर्षीय गोपाल वली र पहिचान नखुलेको एक जना गरी सात जना रहेका छन् ।
घाइतेहरूको उद्धार गरी जिल्ला अस्पताल सल्ले ल्याइएको छ भने घटनाबारे थप विवरण आउन बाँकी छ ।
प्रतिक्रिया दिनुहोस् !