ईर्साद अन्सारी
६ कार्तिक,बारा । तिहारको रमाइलो र उत्सवलाई छाडेर कलैयाका युवाहरू अहिले वर्षौंदेखि अधुरो रहेको कलैया–सितलपुर सडक खण्ड निर्माणका लागि वृहत् हस्ताक्षर अभियानमा जुटेका छन्।
करिब ३ किलोमिटर लामो यो सडक धुलो, हिलो र खाल्डाखुल्डीले त्रासदी बनेपछि नेता तथा स्थानीय निकायको पटक-पटकको आश्वासनबाट दिक्क भएका युवाहरूले ‘उठ र गर’ भन्ने बाटो रोजेका हुन्।
सौरभ पाण्डे लगायतका युवाहरूको अगुवाइमा सुरु भएको यो अभियानमा बिहानैदेखि बेलुकासम्म घर–घर र चौक–चौकमा पुगेर हस्ताक्षर संकलन भइरहेको छ, जहाँ भाइटीकाको दिनमा समेत नागरिकहरू लाइन लागेर हस्ताक्षर गर्न आएका थिए।
हालसम्म २,००० भन्दा बढी हस्ताक्षर संकलन भइसकेको छ र उनीहरूको लक्ष्य ५,००० हस्ताक्षर भौतिक पूर्वाधार तथा यातायात मन्त्रालयमा बुझाएर सडक निर्माणका लागि दबाब दिने रहेको छ।
स्थानीयवासी, वृद्ध, महिला र व्यवसायीको समेत स्वस्फूर्त साथ पाएको यो अभियानले यदि सरकारले तत्काल सडक निर्माणमा ध्यान नदिए अर्को चरणमा सामूहिक आन्दोलन गर्ने चेतावनी दिएको छ।
प्रतिक्रिया दिनुहोस् !