३ कार्तिक,सिरहा । मधेस प्रदेशमा आपराधिक घटनाले विकराल रूप लिइरहेका बेला सिरहा जिल्लामा फेरि एक परिवारमाथि सामूहिक आक्रमण भएको छ । जिल्लाको मिर्चैया नगरपालिका–३ स्थित छड्की टोलमा आइतबार साँझ १५/२० जनाको समूहले खुकुरी, रड, भाटा लगायतका हतियारले आक्रमण गर्दा एकै परिवारका चार सदस्य घाइते भएका छन् ।
घाइते हुनेमा ६० वर्षीय शिवनन्दन यादव, उनकी श्रीमती दुर्गीदेवी यादव, छोरा जमाहिर यादव र बुहारी रीता यादव रहेका छन् । जिल्ला प्रहरी कार्यालयका प्रहरी नायब उपरीक्षक रमेशबहादुर पालले दिएको जानकारीअनुसार, गम्भीर घाइते रीता यादवलाई थप उपचारका लागि जनकपुर पठाइएको छ भने अन्य तीन जनाको उपचार मिर्चैयामै भइरहेको छ ।
पीडित परिवारका अनुसार, ठूलो संख्यामा आएका आक्रमणकारीहरूको समूहले घरमै आएर उनीहरूमाथि निर्घात हमला गरेका थिए ।
प्रहरीले उक्त घटनामा संलग्न भएको आरोपमा चार जनालाई नियन्त्रणमा लिएको छ । पक्राउ पर्नेमा मिर्चैया–३ का पूर्व वडाध्यक्ष हरिकुशियैत यादवसहित किशोर यादव, अशोक यादव र जगदीश यादव रहेका छन् । उनीहरू छिमेकी गाउँ सिसबोनीका बासिन्दा रहेको प्रहरीले जनाएको छ ।
यसैबीच, मधेस प्रदेशमा पछिल्लो समय बढ्दो आपराधिक गतिविधिले नागरिकहरू त्रसित बनिरहेका छन् । सिरहाको यो घटना पनि प्रदेशमा विद्यमान सुरक्षा चुनौतीको एक उदाहरण हो । यद्यपि, प्रहरीले घटनाको कारणबारे विस्तृत अनुसन्धान भइरहेको र थप संलग्नहरूलाई पक्राउ गर्न सक्रियता बढाइएको जानकारी दिएको छ ।
प्रतिक्रिया दिनुहोस् !