१ कात्तिक,काठमाण्डाै । नेपाल प्रहरीले अपहरण तथा शरीर बन्धकको अपराधमा संलग्न दुई भारतीय नागरिकलाई पक्राउ गरेको छ। पक्राउ पर्नेमा भारत, पञ्जाबका २४ वर्षीय परमप्रितसिंह र २८ वर्षीय लवप्रित सिंह रहेका छन्।
जिल्ला प्रहरी परिसरको टोलीले दिएको जानकारीअनुसार उनीहरूले भारत हरियाणाका २६ वर्षीय अङ्कित कुमारलाई झुक्यानमा पारेर नेपाल हुँदै अष्ट्रेलिया पठाइदिने प्रलोभन दिई काठमाडौं ल्याएका थिए। काठमाडौं आएपछि उनीहरूले कुमारलाई बन्धक बनाएको सूचना प्रहरीले पाएको थियो।
परिसरका प्रवक्ता, प्रहरी उपरीक्षक पवनकुमार भट्टराईका अनुसार बन्धक बनाइएका पीडितसँग अपहरणकारीहरूले २० लाख रुपैयाँ फिरौतीसमेत मागेका थिए। सोही सूचनाका आधारमा प्रहरीले शुक्रबार सुन्धारास्थित होटल न्यू जोमसोमको कोठा नं ६ मा छापा मारी दुवै जनालाई पक्राउ गरेको हो।
प्रहरीले उनीहरूका साथबाट विभिन्न कम्पनीका चार थान मोबाइलसमेत बरामद गरेको छ। प्रवक्ता भट्टराईले जिल्ला अदालत काठमाडौंबाट सात दिनको म्याद थप गरी दुवै अभियुक्तमाथि अनुसन्धान भइरहेको जानकारी दिएका छन्।
प्रतिक्रिया दिनुहोस् !