२९ असाेज,काठमाडौं । नेकपा एमालेको १०औं केन्द्रीय कमिटी बैठक आज (बुधबार) देखि ललितपुरको जावलाखेल भनिमण्डलस्थित प्यार्टी प्यालेस रामबाघ महलमा सुरु हुँदैछ । तीन दिनसम्म चल्ने बैठकमा अध्यक्ष केपी शर्मा ओलीले समसामयिक राजनीतिक प्रतिवेदन पेश गर्नेछन् ।
एमाले प्रचार विभाग प्रमुख राजेन्द्र गौतमका अनुसार बैठकको सुरूमा अध्यक्ष ओलीले प्रतिवेदन पेश गर्ने कार्यक्रम रहेको छ ।
ओली निकट नेताहरुको भनाइ अनुसार सो प्रतिवेदनमा जेनजी युवा आन्दोलन, त्यसको असर र परिणाम, र जेनजी आन्दोलनको बलमा गठन भएको अन्तरिम सरकारले आगामी फागुन २१ गते गराउने भनिएको निर्वाचन लगायतका विषय समेटिएका छन् ।
यसैगरी, अध्यक्ष केपी शर्मा ओलीले राजनीतिक प्रतिवेदनमा प्रतिनिधि सभा विघटन असंवैधानिक भएको ठहर गर्दै त्यसको पुनर्स्थापनामा जोड दिएका छन् । लोकतन्त्र पुनर्बहाली गर्न प्रतिनिधि सभा पुनर्स्थापना हुनुपर्ने ओलीको जोड छ ।
स्रोतका अनुसार त्यसका लागि लोकतान्त्रिक गणतन्त्रको पक्षमा रहेका दलहरुसँग सहकार्य र जनपरिचालन गर्नुपर्ने विषयलाई पनि ओलीले प्राथमिकताका साथ उल्लेख गरेका छन् । प्रतिनिधि सभा पुनर्स्थापनाको मागमा जनता सडकमा आउने उनको विश्वास रहेको बताइएको छ ।
केन्द्रीय कमिटी बैठक ३ दिनसम्म चल्ने एमालेले जनाएको छ ।
प्रतिक्रिया दिनुहोस् !