२५ असाेज,बारा । तिहार र छठ पर्व नजिकिँदै गर्दा घर लिपपोतका लागि माटो खन्ने क्रममा बाराको सिम्रौनगढ नगरपालिकामा माटोको ढिस्कोमा पुरिएर दुई जनाको मृत्यु भएको छ भने ६ जना घाइते भएका छन्।
इलाका प्रहरी कार्यालय सिम्रौनगढ, बाराका अनुसार सनिबार बिहान अन्दाजी ८:५० बजे सिम्रौनगढ नगरपालिका वडा नं. ६ पानी ट्याङ्की नजिक रहेको इशरा पोखरीको डिलमा घर लिपपोत गर्न माटो खन्ने क्रममा ढिस्को खसेको थियो।
घटनामा पुरिएका ६ जना मानिसहरूलाई तत्काल उद्धार गरी उपचारका लागि पठाइएको थियो। मृत्यु हुनेमा सिम्रौनगढ न.पा. ६ सानो इटवाल बस्ने दशरथ महतोको श्रीमती अन्दाजी ७० वर्षीया शारदा देवी महतोलाई प्रादेशिक अस्पताल कलैया लैजाँदै गर्दा बाटोमै मृत्यु भएको थियो।
त्यस्तै, सिम्रौनगढ न.पा. ५ सानो इटवाल बस्ने राजेश्वर महतोको छोरा अन्दाजी १५ वर्षीय निरहुवा भन्ने सुनिल महतोलाई कलैया मेट्रो अस्पताल पुर्याउँदा डाक्टरले मृत घोषणा गरेका थिए।
घटनामा घाइते हुनेहरूमा सिम्रौनगढ कंकाली अस्पतालमा उपचाररत सिम्रौनगढ न.पा. ६ सानो इटवालका १४ वर्षीय साजन महतो, सिम्रौनगढ न.पा. ५ सानो इटवालका १५ वर्षीय नितेश महतो र सिम्रौनगढ न.पा. ५ सानो इटवालकी १४ वर्षीया रानी कुमारी महतो छन्।
रानी कुमारी महतोको बायाँ हात भाँचिएको र अवस्था मध्यम रहेको छ भने बाँकीको हातखुट्टा तथा टाउकोमा चोट लागेको र अवस्था सामान्य रहेको प्रहरीले जनाएको छ। यस्तै, प्रादेशिक अस्पताल कलैयामा सिम्रौनगढ न.पा. ६ अमरपुरका १८ वर्षीय गौतम मुखियाको उपचार भइरहेको छ भने सिम्रौनगढ धर्मनगर अस्पतालमा सिम्रौनगढ न.पा. ५ सानो इटवालकी १४ वर्षीया सुशिला कुमारी महतो र १५ वर्षीय राजा बाबु शर्माको उपचार भइरहेको छ, जसमा राजा बाबु शर्माको ढाड र कम्मरमा चोट लागेको छ।
घटनाको खबर प्राप्त हुनासाथ इलाका प्रहरी कार्यालय सिम्रौनगढका प्रहरी निरीक्षक पवन पछाईको कमाण्डमा १४ जना र सशस्त्र प्रहरी बेस सिम्रौनगढबाट स.प्र.स.नि.को कमाण्डमा ७ जनाको टोली उद्धारका लागि खटिएको थियो। तराई मधेशमा पर्वहरू नजिकिँदै गर्दा घर लिपपोतका लागि खेत र पोखरीबाट माटो ल्याउने प्रचलन रहेको छ। मृत्ककाे प्रादेशिक अस्पताल कलैयामा शल्यकृया भईरहेकाे प्रहरले जनाएकाेे छ ।
प्रतिक्रिया दिनुहोस् !